കോട്ടയം: ആര്‍പ്പൂക്കര മെഡിക്കല്‍ കോളജ് ഗവ. വൊക്കേഷണല്‍ ഹയര്‍സെക്കന്‍ഡറി സ്‌കൂളിന്റെ അന്‍പതാം വാര്‍ഷികാഘോഷങ്ങള്‍ക്ക് ഇന്ന് തിരശീല വീഴും. സമാപന സമ്മേളനം എം.ജി യൂനിവേഴ്‌സിറ്റി വൈസ് ചാന്‍സിലര്‍ ഡോ. ബാബു സെബാസ്റ്റിയന്‍ ഉദ്ഘാടനം ചെയ്യും.
സ്മൃതിപഥം എന്ന പേരില്‍ ആരംഭിച്ച ഒരു വര്‍ഷം നീണ്ടു നിന്ന പരിപാടിക്ക് സമാപനം കുറിക്കുമ്പോള്‍ സ്‌കൂളിനെ കായിക മികവിന്റെ കേന്ദ്രമാക്കുന്നതില്‍ പങ്ക് വഹിച്ച അധ്യാപകരെ ആദരിക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ വ്യക്തമാക്കി. ജോസഫ് പേമല, കെ.വി ലീലാമ്മ എന്നിവരെയാണ് സമ്മേളനത്തില്‍ ആദരിക്കുക.
ചടങ്ങില്‍ സുരേഷ് കുറുപ്പ് എം.എല്‍.എ മുഖ്യ പ്രഭാഷണം നടത്തും. ഏറ്റുമാനൂര്‍ ബ്ലോക്ക് പഞ്ചായത്ത് പ്രസിഡന്റ് പി.വി മൈക്കിള്‍ സതീര്‍ത്ഥ്യം സി.ഡി പ്രകാശന കര്‍മം നടത്തും.
ജില്ലാ പഞ്ചായത്ത് മെമ്പര്‍ അഡ്വ. ബി മഹേഷ് ചന്ദ്രന്‍ കനക ജൂബിലി സ്മാരകം തറക്കല്ലിടീല്‍ കര്‍മം നിര്‍വഹിക്കുമെന്നും ഭാരവാഹികള്‍ അറിയിച്ചു. ചടങ്ങില്‍ സുവനീര്‍ പ്രകാശം നടത്തും. ആര്‍പ്പൂക്കര ഗ്രാമപഞ്ചായത്ത് പ്രസിഡന്റ് ആനന്ദ് പഞ്ഞിക്കാരനാണ് സുവനീര്‍ പ്രകാശനം ചെയ്യുക. ആഘോഷ ചടങ്ങുകളുടെ സമാപന ദിവസമായ ഇന്ന് കലാ -കായിക പ്രതിഭകളെ അനുമോദിക്കും.
പി.ടി.എ പ്രസിഡന്റ് വി.എന്‍ രമണന്‍ അധ്യനാകുന്ന സമ്മേളനത്തില്‍ കനക ജൂബിലി ആഘോഷ കമ്മിറ്റി ജനറല്‍ കണ്‍വീനര്‍ സുജാത പി സ്വാഗതവും ഹയര്‍സെക്കന്‍ഡറി പ്രിന്‍സിപ്പല്‍ പ്രിന്‍സി ഗ്രിഗോറിയല്‍ നന്ദിയും പറയും.