പാലാ: ജനപ്രതിനിധികള്‍ ശക്്തമായ നിലപാട് എടുത്തതോടെ കോടതിയുത്തരവിന്റെ പിന്‍ബലത്തില്‍ പൊലിസ് സംരക്ഷണയോടെ കോട്ടമലയില്‍ നടത്തിക്കൊണ്ടിരുന്ന നിര്‍മാണ പ്രവര്‍ത്തനങ്ങള്‍ക്ക് താത്കാലിക വിരാമം.
ഇടുക്കി ജില്ലയിലെ കോടതിയില്‍ നിന്നും റബ്ബര്‍ കൃഷിയ്ക്ക് വേണ്ടിയെന്ന പേരില്‍ റോഡു നിര്‍മാണ പ്രവര്‍ത്തനത്തിന് കോടതി ഉത്തരവ് വാങ്ങിച്ച പാറമട ഉടമയുടെ നീക്കത്തിനേറ്റ ശക്തമായ തിരിച്ചടിയായി രാമപുരം പഞ്ചായത്തിന്റെ സ്റ്റോപ്പ് മെമ്മോ. ചൊവ്വാഴ്ച മുതലായിരുന്നു പൊലിസ് സംരക്ഷണയില്‍ കോട്ടമലയില്‍ റോഡ് നിര്‍മാണം ആരംഭിച്ചത്.
മണ്ണുമാന്തിയന്ത്രങ്ങളും ടിപ്പറും മറ്റും ഉപയോഗിച്ച് നാട്ടുകാര്‍ അറിയാതെ നടത്തിയ പ്രവര്‍ത്തനങ്ങള്‍ക്കെതിരേ പ്രദേശവാസികള്‍ പ്രതിഷേധവുമായി രംഗത്ത് എത്തിയിരുന്നു.
പഞ്ചായത്തിന്റെ അനുമതിയില്ലാതെ നടത്തിയ വഴിവെട്ട് നടത്തിയതിന് രാമപുരം പഞ്ചായത്ത് പ്രസിഡന്റിന്റെ നിര്‍ദ്ദേശീനുസരണം സ്റ്റോപ് മെമ്മോ നല്‍കി. എന്നാല്‍ പഞ്ചായത്ത് ജീവനക്കാരന്‍ നല്‍കിയ സ്റ്റോപ്പ് മെമ്മോ സ്വീകരിക്കാതെ നിര്‍മാണ പ്രവര്‍ത്തനങ്ങള്‍ തുടര്‍ന്നു. ഇന്നലെയും രാവിലെയും ഇത് തുടര്‍ന്നു. പൊലിസും പ്രശ്‌നത്തില്‍ ഇടപെടാന്‍ താത്പര്യം കാട്ടിയിരുന്നില്ല.
മതുടര്‍ന്ന് പഞ്ചായത്ത് പ്രസിഡന്റും സി.പി.എം നേതൃത്വവും പൊലിസിനോട് നടപടിയെടുക്കണമെന്ന് കര്‍ശനമായി ആവശ്യപ്പട്ടതോടെ പൊലിസ് കോട്ടമലയിലെത്തി നിര്‍മാണ പ്രവര്‍ത്തനം നിര്‍ത്തി വയ്പ്പിക്കുകയായിരുന്നു.
അവിടെ ക്രമസമാധാന പ്രശ്‌നം ഉണ്ടാകുമെന്നും ഇനിയൊരു ഉത്തരവ് ഉണ്ടാകുന്നതുവരെ നിര്‍മാണം നടത്തരുതെന്നും പോലിസ് നിര്‍ദ്ദേശിച്ചു.
സി.പി.എം കിഴതിരി ബ്രാഞ്ച് സെക്രട്ടറി മോഹനന്‍ താഴത്തിടപ്പാട്ടിന്റെ നേതൃത്വത്തില്‍ സമരസമിതി നേതാവ് ഫാ. തോമസ് ആയിലുക്കുന്നേല്‍ സി.പി.എം. കോട്ടയം ജില്ലാ സെക്രട്ടറി വി.എം. വാസവനെ സന്ദര്‍ശിച്ച് കോട്ടമലയില്‍ പാറമടയും, ക്രഷര്‍ യൂനിറ്റും വന്നാല്‍ ഉണ്ടാകുന്ന പാരിസ്ഥിതി വിഷയങ്ങള്‍ ബോദ്ധ്യപ്പെടുത്തിയിരുന്നു.