ദമാം: മുസ്‌ലിം ലീഗ് ദേശീയ അധ്യക്ഷന്‍ ഇ അഹമ്മദിന്റെ നിര്യാണത്തില്‍ എസ്.കെ.ഐ.സി ദമാം കമ്മിറ്റി അനുശോചനം രേഖപ്പെടുത്തി. നാടിനും സമൂഹത്തിനും കരുത്തുറ്റ ഒരു നേതാവിനെയാണ് നഷ്ടപ്പെട്ടതെന്നും മുസ്‌ലിം ന്യൂനപക്ഷാവകാശങ്ങളുടെ മുന്നണിപ്പോരാളിയായിരുന്ന അഹമ്മദ് സാഹിബിന്റെ മരണം നികത്താനാവാത്ത നഷ്ടമാണുണ്ടാക്കിയതെന്നും അനുശോചന യോഗം അഭിപ്രായപ്പെട്ടു. സി.എച്ച് മൗലവി, ശരീഫ് റഹ്മാനി, മുസ്തഫ ദാരിമി, മുസ്തഫ റഹ്മാനി,അബ്ദുറഹ്മാന്‍ പൂനൂര്‍, മാഹിന്‍ വിഴിഞ്ഞം, ഉണ്ണീന്‍കുട്ടി മണ്ണാര്‍ക്കാട് എന്നിവര്‍ പങ്കെടുത്തു.

ദമാം: ഇ.അഹ്മദിന്റെ നിര്യാണത്തില്‍ ദമാം സെന്‍ട്രല്‍ കമ്മിറ്റി അനുശോചനം രേഖപ്പെടുത്തി. സമസ്തയും ലീഗും മഹാന്‍മാര്‍ ഉണ്ടാക്കിയതാണെന്നും അവയില്‍ ഉറച്ച് നില്‍ക്കേണ്ടത് നമ്മുടെ വിജയത്തിന് അനിവാര്യമാണെന്നും എപ്പോഴും പറയാറുള്ള ഇ അഹ്മദ് സാഹിബിന്റെ വാക്കുകള്‍ യോഗത്തില്‍ സ്മരിക്കപ്പെട്ടു. അദ്ദേഹത്തിന്റെ പരലോക വിജയത്തിനായ് പ്രാര്‍ത്ഥിക്കുകയും ചെയ്തു. ദാറുല്‍ അമാനില്‍ ചേര്‍ന്ന യോഗത്തില്‍ ബഷീര്‍ ബാഖവി, അശ്‌റഫ് അശ്‌റഫി, കബീര്‍ ഫൈസി, സൈതലവി ഹാജി സുബൈര്‍ അസ്ഹരി ഷിഹാബ് ഫൈസി അഹ്മദ് ദാരിമി എന്നിവര്‍ പങ്കെടുത്തു.

മക്ക: ഇ.അഹമ്മദ് വിദേശ സഹമന്ത്രിയായ കാലം ഇന്ത്യന്‍ ജനതക്ക് ആശ്വാസത്തിന്റെ പൊന്‍ കിരണമായിരുന്നെന്ന് മക്ക എസ്.കെ.ഐ.സി അനുശോചിച്ചു.

വിവിധ രാജ്യങ്ങളില്‍ കഷ്ടപ്പെടുകയും അകാരണമായി പീഡനമനുഭവിക്കുകയും ചെയ്തിരുന്ന ആയിരങ്ങള്‍ക്ക് ആശ്വാസമായ അദ്ദേഹത്തിന്റേത് അനുഗ്രഹീത സമീപനമായിരുന്നു. അദ്ദേഹത്തിന്റെ മരണം ഇന്ത്യന്‍ ജനതക്ക് പ്രത്യേകിച്ച് പ്രവാസി സമൂഹത്തിന് തീരാ നഷ്ടമാണെന്നും മക്ക എസ്.കെ.ഐ.സി ഭാരവാഹികളായ സി.എം.എ നാസര്‍ അന്‍വരി പുത്തൂര്‍,ഫരീദ് ഐക്കരപ്പടി ലത്തീഫ് മംഗലാപുരം എന്നിവര്‍ അനുശോചന കുറിപ്പില്‍ അറിയിച്ചു.

ദമാം: അല്‍ഹസ കെ.എം.സി.സി സംഘടിപ്പിച്ച അനുസ്മരണ സമ്മേളനത്തില്‍ അബുട്ടി മാസ്റ്റര്‍ ശിവപുരം അധ്യക്ഷനായി. എസ്.കെ.ഐ.സി അല്‍ ഹസ ചെയര്‍മാന്‍ വി അബ്ദുള്ള മുസ്‌ല്യാര്‍, ഇബ്രാഹിം മുഹമ്മദ്,അബ്ദുല്‍ നാസര്‍ മദനി, ഹനീഫ് മുവാറ്റുപുഴ, കുഞ്ഞാലസ്സന്‍കുട്ടി, അബ്ദുല്‍ മജീദ് കൊടശേശരിസംസാരിച്ചു. സയ്യിദ് ഉമര്‍ തങ്ങള്‍ ജമലുല്ലൈലി ജനാസ നിസ്‌കാരത്തിനും ദുആക്കും നേതൃത്വം നല്‍കി.

അല്‍ബാഹ: ബല്‍ജുറശി കെ.എം.സി.സി ഇ അഹമ്മദ് അനുസ്മരണ യോഗത്തില്‍
അസീസ് ഫൈസി പനങ്ങാങ്ങര അധ്യക്ഷത വഹിച്ചു. ഹമീദ് മാസ്റ്റര്‍ പറമ്പില്‍പീടിക ഉദ്ഘാടനം ചെയ്തു.
എസ്.കെ.ഐ.സി ബല്‍ജുറശി ചെയര്‍മാന്‍ എം.കെ. മുഹമ്മദ് ദാരിമി തുവ്വൂര്‍ അനുസ്മരണ പ്രഭാഷണം നടത്തി. സലാഹുദ്ധീന്‍ ചോക്കാട്, മൊയ്തീന്‍കുട്ടി വേങ്ങര, നജ്മുദ്ദീന്‍ അസ്‌ലമി സംസാരിച്ചു.