ന്യൂഡല്‍ഹി: എക്‌സെല്‍-മാക്‌സിസ് അഴിമതി കേസില്‍ മാരന്‍ സഹോദരന്മാരെ കുറ്റവിമുക്തരാക്കിയ ഡല്‍ഹി പട്യാല കോടതി നടപടിക്കെതിരേ എന്‍ഫോഴ്‌സ്‌മെന്റ് ഡയരക്ടറ്റേറ്റ്(ഇ.ഡി) സുപ്രിം കോടതിയെ സമീപിച്ചു. കേസിന്റെ ഭാഗമായി ഇരുവരില്‍നിന്നു കണ്ടുകെട്ടിയ സ്വത്തുക്കള്‍ തിരിച്ചുനല്‍രുതെന്നും ഏജന്‍സി സുപ്രിം കോടതിയോട് ആവശ്യപ്പെട്ടു.
കേസില്‍ വിചാരണ നേരിടുന്ന മുന്‍ കേന്ദ്ര മന്ത്രിയും ഡി.എം.കെ നേതാവുമായ ദയാനിധി മാരന്‍, സഹോദരന്‍ കലാനിധി മാരന്‍ എന്നിവരെ കഴിഞ്ഞ ദിവസം പ്രത്യേക 2ജി കോടതി കുറ്റവിമുക്തരാക്കി വിധി പ്രസ്താവിച്ചിരുന്നു. ഇവരോടൊപ്പം കുറ്റാരോപിതരായിരുന്ന മറ്റുള്ളവരെയും കോടതി കുറ്റവിമുക്തമാക്കിയിട്ടുണ്ട്. ഔദ്യോഗികരേഖകള്‍ തെറ്റായി വായിച്ചും ഊഹാപോഹങ്ങള്‍ വച്ചുമാണ് ഇവര്‍ക്കെതിരേ കേസ് ചുമത്തിയതെന്നാണു കോടതി നിരീക്ഷിച്ചത്.
എയര്‍സെല്‍-മാക്‌സിസ് അഴിമതിയുമായി ബന്ധപ്പെട്ടു രണ്ട് കേസുകള്‍ ഇന്നലെ സുപ്രിം കോടതി പരിഗണിച്ചു. 2011ല്‍ സി.ബി.ഐയും 2012ല്‍ എന്‍ഫോഴ്‌സ്‌മെന്റ് ഡയരക്ടറേറ്റും ഫയല്‍ ചെയ്ത കേസുകളാണ് കോടതി പരിഗണിച്ചത്. സാമ്പത്തിക തട്ടിപ്പുമായി ബന്ധപ്പെട്ട് മാരന്‍ സഹോദരന്മാരും ഇവരുടെ കീഴിലുള്ള സണ്‍ ഡയരക്ട് ടി.വിയും കേസ് നേരിടുകയാണ്.