വണ്ടൂര്‍: സ്‌കൂള്‍, കോളജ് വിദ്യാര്‍ഥികള്‍ക്ക് കഞ്ചാവ് എത്തിച്ചു കൊടുക്കുന്ന മൊത്ത വിതരണക്കാരന്‍ എക്‌സൈസിന്റെ പിടിയിലായി. പുല്‍പ്പറ്റ സ്വദേശി പുത്തന്‍ പീടിയേക്കല്‍ ഷംസുദ്ദീ(35)നെയാണ് കാളികാവ് റെയ്ഞ്ച് എക്‌സൈസ് ഇന്‍സ്‌പെക്ടര്‍ കെ.ടി സജിമോനും സംഘവും അറസറ്റ് ചെയ്തത്. ഇയാളില്‍ നിന്നും 250 ഗ്രാം കഞ്ചാവും ഒരു മോട്ടോര്‍ സൈക്കിളും പിടിച്ചെടുത്തു. വിദ്യാര്‍ഥികള്‍ക്ക് ചെറുപൊതികള്‍ 30 രൂപയ്ക്കാണ് വില്‍പ്പന നടത്തുന്നത്.
വണ്ടൂര്‍ ടൗണിലെയും പരിസരങ്ങളിലെയും സ്‌കൂള്‍ കോളജ് വിദ്യാര്‍ഥികളാണ് ഉപഭോക്താക്കളില്‍ ഏറെയും. മണ്ണാര്‍ക്കാട് ഭാഗത്ത് നിന്നാണ് ഇയാള്‍ കഞ്ചാവ് മൊത്ത വിതരണത്തിനെടുത്തിരുന്നതെന്ന് എക്‌സൈസ് ഉദ്യോഗസ്ഥര്‍ പറഞ്ഞു. സ്‌കൂള്‍ കോളജ് പരിസരങ്ങളിലുള്ള വില്‍പ്പനക്കാര്‍ക്ക് അന്‍പതും നൂറും പൊതികള്‍ മൊത്തമായിട്ടാണ് ഇയാള്‍ വിതരണം ചെയ്തിരുന്നത്. തിരുവാലി പൂന്തോട്ടത്തു വച്ച് വാഹന പരിശോധന നടത്തവേ നിര്‍ത്താതെ പോയ ഇയാളെ എക്‌സൈസ് സംഘം പിന്തുടര്‍ന്ന് പിടികൂടുകയായിരുന്നു. പ്രിവന്റീവ് ഓഫിസര്‍ ശങ്കരനാരായണന്‍, സി. ശ്രീകുമാര്‍, സിവില്‍ എക്‌സൈസ് ഓഫീസര്‍മാരായ പി. അശോക്, ആര്‍.പി സുരേഷ് ബാബു, പി.കെ പ്രശാന്ത്, കെ.പി സാജിദ് എന്നിവരും സംഘത്തിലുണ്ടായിരുന്നു.