തിരവനന്തപുരം: കേരളത്തിന്റെ വികസനപ്രവര്‍ത്തനങ്ങള്‍ക്ക് എക്കാലവും നേതൃത്വം നല്‍കിയിരുന്ന അന്തരിച്ച മുന്‍ കേന്ദ്രമന്ത്രി ഇ. അഹമ്മദിനോട് കേന്ദ്രസര്‍ക്കാരും ബി.ജെ.പിയും അനാദരവ് കാട്ടിയിട്ടില്ലെന്ന് ബി.ജെ.പി നേതാവ് ഒ. രാജഗോപാല്‍ എം.എല്‍.എ പറഞ്ഞു. ഇതുസംബന്ധിച്ചുള്ള വാര്‍ത്തകള്‍ ശരിയല്ലെന്ന് മരണത്തെ സംബന്ധിച്ച് ബി.ജെ.പി നേതാക്കളുമായി ചര്‍ച്ച നടത്തിയെന്നു രാജഗോപാല്‍ വ്യക്തമാക്കി.
പ്രധാനമന്ത്രി നരേന്ദ്രമോഡിയടക്കമുള്ളവര്‍ അദ്ദേഹത്തിന്റെ വസതിയിലെത്തി അന്ത്യോപചാരമര്‍പ്പിക്കുകയും മുസ്‌ലിംകള്‍ക്ക് വേണ്ടി എക്കാലവും ജീവിച്ച വ്യക്തയായിരുന്നു അഹമ്മദ് സാഹിബെന്ന് മോഡി പറഞ്ഞതും എല്ലാവര്‍ക്കും അറിയാമെന്നും ബി.ജെ.പിയുടെ ഉറ്റചങ്ങാതിയായിരുന്നു ഇ. അഹമ്മദെന്നും രാജഗോപാല്‍ പറഞ്ഞു. മുസ്‌ലിം അസോസിയേഷന്‍ സംഘടിപ്പിച്ച അനുസ്മരണയോഗത്തില്‍ പങ്കെടുത്തു സംസാരിക്കുകയായിരുന്നു അദ്ദേഹം.
പ്രസിഡന്റ് ഇ.എം നജീബ് അധ്യക്ഷത വഹിച്ചു. മുന്‍ മുഖ്യമന്ത്രി ഉമ്മന്‍ചാണ്ടി, മന്ത്രി കടകംപള്ളി സുരേന്ദ്രന്‍, കെ.ടി ജലീല്‍, സി.പി.ഐ നേതാവ് പന്ന്യന്‍ രവീന്ദ്രന്‍, കെ.പി.സി.സി പ്രസിഡന്റ് വി.എം സുധീരന്‍, ടി.പി ശ്രീനിവാസന്‍, കടയ്ക്കല്‍ അബ്ദുല്‍അസീസ് മൗലവി, എം. വിജയകുമാര്‍, പാളയം ഇമാം ഷുഹൈബ് മൗലവി സംസാരിച്ചു.