പോരാട്ടം അവസാനിക്കുന്നില്ല. മുണ്ടൂര്‍ രാവുണ്ണിയുടെ അഭിമുഖം പ്രസക്തമായി. അടുത്തിടെ ജയില്‍മോചിതനായ ആ വിപ്ലവകാരിയെക്കുറിച്ച് മറ്റെങ്ങും വായിക്കാനായില്ല. മാവോയിസ്റ്റുകളോട് ഐക്യദാര്‍ഢ്യം പ്രഖ്യാപിച്ചതിന് ജയിലിലായ അദ്ദേഹത്തിന്റെ ഇന്നലെകളെക്കുറിച്ച് ഫീച്ചറിലൂടെയാണറിഞ്ഞത്. എന്നാല്‍ ഭരണകൂടം കാണിച്ച നെറികേടുകളും അറസ്റ്റിലേക്കു നയിച്ച സംഭവങ്ങളെക്കുറിച്ചുള്ള പ്രതികരണങ്ങളുമായിരുന്നു പ്രതീക്ഷിച്ചത്. അതേക്കുറിച്ച് കൂടുതല്‍ വിശദീകരണമില്ലാത്തത് നിരാശനുമാക്കി. യു.എ.പി.എ ചുമത്തപ്പെട്ട ഒരാള്‍ക്ക് ചില അപ്രിയസത്യങ്ങള്‍ തുറന്നു പറയുന്നതിനും പരിമിതികളുണ്ടാകുമല്ലോ. വിപ്ലവത്തിന്റെ വിരുന്നുസല്‍ക്കാരമൊക്കെ പ്രസിദ്ധീകരിച്ച് സുപ്രഭാതം എല്ലാവരുടെയും പത്രമാണെന്നു കാണിച്ചു തന്നതിന് പ്രത്യേക നന്ദി.