ജൊഹന്നാസ്ബര്‍ഗ്: ഇന്ത്യന്‍ പ്രീമിയര്‍ ലീഗിനും ആസ്‌ത്രേലിയയിലെ ബിഗ് ബാഷ് ലീഗിനും സമാനമായി പുതിയ ടി20 ലീഗ് ആരംഭിക്കാന്‍ ക്രിക്കറ്റ് ദക്ഷിണാഫ്രിക്ക ഒരുങ്ങുന്നതായി റിപ്പോര്‍ട്ടുകള്‍. എട്ടു ടീമുകളെ ഉള്‍പ്പെടുത്തി ടി20 ഗ്ലോബല്‍ ലീഗ് എന്ന പേരിലാണു ടൂര്‍ണമെന്റ് നടത്താന്‍ ബോര്‍ഡ് പദ്ധതികള്‍ ആവിഷ്‌കരിക്കുന്നത്. ഈ വര്‍ഷം അവസാനം പോരാട്ടങ്ങള്‍ നടത്താന്‍ ലക്ഷ്യമിട്ടു ഫ്രാഞ്ചൈസികള്‍ക്കായുള്ള ടെന്‍ഡര്‍ പുറപ്പെടുവിച്ചു. ടീം ഉടമകള്‍ ആകാന്‍ ആഗ്രഹിക്കുന്നവര്‍ ഔദ്യോഗികമായി ലേലത്തിനുള്ള അപേക്ഷ നല്‍കണം. മാര്‍ച്ച് മൂന്നു വരെ ഇതുമായി ബന്ധപ്പെട്ട നടപടി ക്രമങ്ങള്‍ തുടരും.
ആറു ടീമുകള്‍ മത്സരിക്കുന്ന ടി20 ടൂര്‍ണമെന്റ് ദക്ഷിണാഫ്രിക്കയില്‍ നിലവില്‍ ഉണ്ടെങ്കിലും അതിനു ആഗോള തലത്തില്‍ വേണ്ടത്ര ശ്രദ്ധ നേടാന്‍ സാധിച്ചിരുന്നില്ല. എ.ബി ഡിവില്ല്യേഴ്‌സ്, ഫാഫ് ഡുപ്ലെസിസ് എന്നീ മുന്‍നിര ദക്ഷിണാഫ്രിക്കന്‍ താരങ്ങള്‍ ഐ.പി.എല്ലില്‍ കളിക്കുന്നുണ്ടെങ്കിലും നിലവില്‍ ദക്ഷിണാഫ്രിക്കയില്‍ നടക്കുന്ന ലീഗില്‍ കളിക്കുന്നില്ല.
ഇരു ലീഗുകളുടെയും തിയതികള്‍ തമ്മില്‍ ഒരുമിച്ചു വരുന്നതും ടീമുകളുടെ എണ്ണക്കുറവുമാണ് വലിയ താരങ്ങളെ ആറു ടീമുകളുള്ള ലീഗില്‍ നിന്നു അകറ്റിയത്. ഈ പശ്ചാത്തലത്തിലാണു ഐ.പി.എല്‍ മാതൃകയിലുള്ള ലീഗെന്ന ആശയത്തിലേക്ക് ദക്ഷിണാഫ്രിക്കന്‍ ക്രിക്കറ്റ് ബോര്‍ഡ് എത്തിയത്. പുതിയ ലീഗില്‍ ഡിവില്ല്യേഴ്‌സടക്കമുള്ള താരങ്ങളുടെ സാന്നിധ്യവും അവര്‍ പ്രതീക്ഷിക്കുന്നു. ദക്ഷിണാഫ്രിക്കയുടെ ആശയത്തോടു ഐ.സി.സിക്കും അനുകൂല സമീപനമാണ് ഉള്ളത്.