ദോഹ: 2018 റഷ്യന്‍ ലോകകപ്പിനായി ഖത്തര്‍ എയര്‍വേയ്‌സ് പ്രത്യേക യാത്രാ പാക്കേജ്. ഖത്തര്‍ എയര്‍വേയ്‌സ് ഹോളിഡേയ്‌സ് ട്രാവല്‍ പാക്കേജും ലോകകപ്പിനായി പ്രത്യേക പാക്കേജും പ്രഖ്യാപിച്ചിട്ടുണ്ട്. ഖത്തറിലെ ഫുട്‌ബോള്‍ പ്രേമികള്‍ക്ക് മികച്ച ലോകകപ്പ് അനുഭവം ഒരുക്കുകയെന്നതാണ് ഇതിലൂടെ ലക്ഷ്യമിടുന്നത്. ജൂണ്‍ 14 മുതല്‍ ജൂലൈ 15 വരെയാണ് റഷ്യന്‍ ലോകകപ്പ്.

വിമാനം, ഹോട്ടല്‍ താമസം, മത്സരത്തിനുള്ള ടിക്കറ്റ് എന്നിവയുള്‍പ്പെട്ടതാണ് യാത്രാപാക്കേജ്. ഫുട്‌ബോള്‍ ആസ്വാദകര്‍ക്ക് ജനുവരി 31വരെ പാക്കേജ് സ്വന്തമാക്കാന്‍ അവസരമുണ്ട്. ഗ്രൂപ്പ് മത്സരങ്ങള്‍ക്കും സെമി ഫൈനല്‍, ഫൈനല്‍ മത്സരങ്ങള്‍ക്കും പാക്കേജ് ലഭ്യമാണ്. ഇതിനായി www.qrfootballpackages.com വെബ്‌സൈറ്റ് സന്ദര്‍ശിക്കണം. ഖത്തര്‍എയര്‍വേയ്‌സിന്റെ ഫഌയര്‍ പ്രോഗ്രാമിലെയും പ്രിവിലേജ് ക്ലബ്ബിലെയും അംഗങ്ങള്‍ക്കും ഫിഫ ലോകകപ്പിനായി എക്‌സ്‌ക്ലൂസീവ് പാക്കേജ് പ്രഖ്യാപിച്ചിട്ടുണ്ട്. ഖത്തര്‍ എയര്‍വേയ്‌സ് ഗ്രൂപ്പിന്റെ ആഡംബര ഒഴിവുകാല വിഭാഗമായ ഖത്തര്‍ എയര്‍വേയ്‌സ് ഹോളിഡേയ്‌സും വിവിധങ്ങളായ പാക്കേജുകളും പ്രഖ്യാപിച്ചിട്ടുണ്ട്. ഇതിനായി വെബ്‌സൈറ്റില്‍ പ്രത്യേക ബുക്കിങ് പ്ലാറ്റ്‌ഫോം ഒരുക്കിയിട്ടുണ്ട്. പാക്കേജില്‍ ലഭ്യമായ വിശദാംശങ്ങളെല്ലാം ഇതിലുണ്ടാകും. മത്സരത്തിന്റെ ടിക്കറ്റിന്റെ വില, തെരഞ്ഞെടുക്കുന്ന ഹോട്ടല്‍ വിഭാഗം, വിമാനം പുറപ്പെടുന്ന സ്ഥലം എന്നിവയെല്ലാം കണക്കിലെടുത്തായിരിക്കും പാക്കേജിന്റെ നിരക്ക്.