നടവയല്‍: ജില്ലയില്‍ കാര്‍ഷിക കടങ്ങള്‍ക്ക് മോറട്ടോറിയം നിലനില്‍ക്കെ വായ്പക്കാര്‍ക്കെതിരേ ജപ്തി നടപടികളുമായി മുന്നോട്ട് പോകുന്ന ധനകാര്യ സ്ഥാപനങ്ങള്‍ക്കെതിരേ ഫാര്‍മേഴ്‌സ് റിലീഫ് ഫോറം പ്രക്ഷോഭത്തിനൊരുങ്ങുന്നു.
നടവയലിലെ ധനകാര്യ സ്ഥാപനത്തില്‍ നിന്നും കാര്‍ഷിക വായ്പയും മറ്റും എടുത്ത് തിരിച്ചടവ് മുടങ്ങിയതിനെ തുടര്‍ന്ന് കുടിശിക വരുത്തിയവരുടെയും വായ്പയെടുത്തതിന് ശേഷം മരണപ്പെട്ട വരുടെ മക്കളുടെ വീടുകളിലും മറ്റും കഴിഞ്ഞ ദിവസം നോട്ടിസ് പതിച്ചിരുന്നു. ഈ സാഹചര്യത്തിലാണ് എഫ്.ആര്‍.എഫ് സമരത്തിനൊരുങ്ങുന്നത്. നടവയല്‍ ചിറ്റാലൂര്‍കുന്ന് മുണ്ടക്കല്‍ ദേവസ്യയുടെ വീടിന് മുന്നിലാണ് കഴിഞ്ഞദിവസം ബാങ്ക് അധികൃതര്‍ നോട്ടിസ് പതിച്ചത്. 2002ലാണ് ദേവസ്യ ബാങ്കില്‍ നിന്ന് മൂന്ന് ലക്ഷം രൂപ വായ്പയെടുക്കുകയും പലിശയടക്കുകയും ചെയ്തിരുന്നു. എന്നാല്‍ ദേവസ്യ മരിച്ചതോടെ തിരിച്ചടവ് മുടങ്ങി. ദേവസ്യ പ്രായ പൂര്‍ത്തിയാകത്ത കൊച്ചുമക്കളുടെ പേരില്‍ സ്ഥലം ഒസ്യത്ത് എഴുതി വെയ്ക്കുകയും ചെയ്താതിനാല്‍ സ്ഥലം വിറ്റ് ലോണ്‍ തിരിച്ചടക്കാന്‍ കഴിഞ്ഞിരുന്നില്ല. എന്നാല്‍ ബാങ്ക് ഇവരെ മുന്‍കൂട്ടി അറിയിക്കാതെ കഴിഞ്ഞദിവസം വീടിന് മുന്നില്‍ നോട്ടിസ് പതിക്കുകയായിരുന്നെന്ന് എഫ്.ആര്‍.എഫ് പ്രവര്‍ത്തകര്‍ കുറ്റപ്പെടുത്തി. മോറട്ടോറിയം ഒരു തട്ടിപ്പാണെന്നും സര്‍ക്കാര്‍ മോറട്ടോറിയം പ്രഖ്യാപിച്ചാലും ധനകാര്യ സ്ഥാപനങ്ങള്‍ പലിശയിളവോ മറ്റ് കിഴിവുകളോ ഒന്നും തന്നെ നല്‍കുന്നില്ലെന്നും ഇവര്‍ ആരോപിക്കുന്നു. കാലാവസ്ഥവ്യതിയാനം മൂലവും വന്യമൃഗശല്യവും മൂലവുംവിളനാശം സംഭവിച്ചതിനാല്‍ തിരിച്ചടവ് മുടങ്ങിയ കാര്‍ഷകരാണ് ജപ്തി നടപടികള്‍ നേരിടുന്നവരില്‍ ഏറെയും.
കര്‍ഷകദ്രോഹ നടപടിയുമായി മുന്നോട്ടു പോകുന്ന ധനകാര്യ സ്ഥാപനങ്ങളെ ഉപരോധിക്കുമെന്ന് എഫ്.ആര്‍.എഫ് നടവയല്‍ യൂനിറ്റ് ഭാരവാഹികള്‍ പറഞ്ഞു. യോഗത്തില്‍ ഇ.വി ജോയി, ബാബു പരുവ്വുമ്മേല്‍, ഗ്രേഷ്യസ് നടവയല്‍, റോബര്‍ട്ട് കരിക്കട്ടുകുഴി, ജോസ് ആലാപുറം എന്നിവര്‍ സംസാരിച്ചു.