ലണ്ടന്‍: ഇംഗ്ലീഷ് ലീഗ് കപ്പ് സെമി പോരാട്ടത്തിന്റെ ആദ്യ പാദത്തില്‍ സ്വന്തം തട്ടകത്തില്‍ മാഞ്ചസ്റ്റര്‍ സിറ്റിക്ക് വിജയം. ഒന്നിനെതിരേ രണ്ട് ഗോളുകള്‍ക്ക് സിറ്റി, ബ്രിസ്റ്റോള്‍ സിറ്റിയെ പരാജയപ്പെടുത്തി. ആദ്യ പകുതിയില്‍ ഒരു ഗോളിന് മുന്നില്‍ നിന്ന ബ്രിസ്റ്റോളിനെ രണ്ടാം പകുതിയില്‍ നേടിയ രണ്ട് ഗോളുകളുടെ ബലത്തിലാണ് സിറ്റി മറികടന്നത്. മത്സരം സമനിലയില്‍ അവസാനിക്കുമെന്ന് തോന്നിച്ച ഘട്ടത്തില്‍ പകരക്കാരനായി കളത്തിലെത്തിയ സെര്‍ജിയോ അഗ്യെറോ ഇഞ്ച്വറി ടൈമില്‍ നേടിയ ഗോളിലാണ് സിറ്റി വിജയം പിടിച്ചത്. സ്വന്തം തട്ടകത്തില്‍ ഒരു ഗോള്‍ വഴങ്ങിയതിനാല്‍ രണ്ടാം പാദത്തില്‍ മാഞ്ചസ്റ്റര്‍ സിറ്റിക്ക് വിജയം അനിവാര്യമാണ്.
കളിയുടെ 44ാം മിനുട്ടില്‍ ലഭിച്ച പെനാല്‍റ്റി വലയിലാക്കി ബ്രിസ്റ്റോള്‍ ആദ്യ പകുതിയില്‍ സിറ്റിയെ ഞെട്ടിച്ചു. എന്നാല്‍ 55ാം മിനുട്ടില്‍ ഡി ബ്രുയ്‌ന്റെ ഗോളില്‍ സിറ്റി സമനില പിടിച്ചു. 70ാം മിനുട്ടില്‍ യായ ടൂറെയെ പിന്‍വലിച്ചാണ് ഗെര്‍ഡിയോള ആഗ്യെറോയ്ക്ക് അവസരം നല്‍കിയത്. സ്വന്തം തട്ടകത്തില്‍ ദുര്‍ബലരായ എതിരാളികള്‍ക്കെതിരേ സമനില വഴങ്ങേണ്ടി വരുമെന്ന നില വന്ന ഘട്ടത്തില്‍ കളിയുടെ ലോങ് വിസില്‍ മുഴങ്ങുന്നതിന്റെ തൊട്ടുമുന്‍പ് അഗ്യെറോ ഹെഡ്ഡറിലൂടെ ഗോള്‍ നേടിയാണ് സിറ്റിക്ക് വിജയമൊരുക്കിയത്.

അത്‌ലറ്റിക്കോ മാഡ്രിഡ് ക്വാര്‍ട്ടറില്‍

മാഡ്രിഡ്: കരുത്തരായ അത്‌ലറ്റിക്കോ മാഡ്രിഡ്, വലന്‍സിയ ടീമുകള്‍ സ്പാനിഷ് കിങ്‌സ് കപ്പ് പോരാട്ടത്തിന്റെ ക്വാര്‍ട്ടറില്‍. പ്രീ ക്വാര്‍ട്ടറിന്റെ രണ്ടാം പാദ പോരാട്ടത്തില്‍ അത്‌ലറ്റിക്കോ മാഡ്രിഡ് മറുപടിയില്ലാത്ത മൂന്ന് ഗോളുകള്‍ക്ക് ലെയ്ഡ എസ്‌പോര്‍ത്യുവിനെ കീഴടക്കി. നേരത്തെ ആദ്യ പാദം 4-0ത്തിന് വിജയിച്ച അത്‌ലറ്റിക്കോ ഇരു പാദങ്ങളിലുമായി 7-0ത്തിന്റെ വിജയത്തോടെയാണ് അവസാന എട്ടിലെത്തിയത്. മൂന്ന് ഗോളുകളും രണ്ടാം പകുതിയിലാണ് അത്‌ലറ്റിക്കോ വലയിലാക്കിയത്. കാരസ്‌ക്കോ, ഗമെയ്‌റോ, വിറ്റോലോ എന്നിവര്‍ അത്‌ലറ്റിക്കോയ്ക്കായി വല ചലിപ്പിച്ചു.
വലന്‍സിയ രണ്ടാം പാദ പോരാട്ടത്തില്‍ ലാസ് പല്‍മാസിനെ 4-0ത്തിന് വീഴ്ത്തി. നേരത്തെ ആദ്യ പാദത്തില്‍ 1-1ന് വലന്‍സിയ സമനില വഴങ്ങിയിരുന്നു. രണ്ടാം പാദത്തില്‍ സ്വന്തം തട്ടകത്തില്‍ ഉജ്ജ്വല വിജയം പിടിച്ച് ഇരു പാദങ്ങളിലുമായി 5-1ന്റെ ജയത്തോടെയാണ് അവര്‍ അവസാന എട്ടില്‍ സ്ഥാനമുറപ്പാക്കിയത്.

മിനെര്‍വ ഒന്നാം സ്ഥാനത്ത്
കൊല്‍ക്കത്ത: പരിശീലകന്റെ മാറ്റം മോഹന്‍ ബഗാന്റെ പ്രകടനത്തെ കാര്യമായി സ്വാധീനിച്ചില്ലെന്ന് വ്യക്തമാക്കി അവര്‍ സ്വന്തം തട്ടകത്തില്‍ മിനെര്‍വ പഞ്ചാബിനോട് തോല്‍വി വഴങ്ങി. ഐ ലീഗിലെ ഹോം പോരാട്ടത്തില്‍ 1-2 നാണ് മോഹന്‍ ബഗാന്‍ മിനെര്‍വയോട് തോല്‍വി വഴങ്ങിയത്. ജയത്തോടെ ഈസ്റ്റ് ബംഗാളിനെ രണ്ടാം സ്ഥാനത്തേക്ക് പിന്തള്ളി മിനെര്‍വ 19 പോയിന്റുമായി ഒന്നാം സ്ഥാനത്തേക്ക് കയറി. ഏഴ് മിനുട്ടിനിടെ ചെന്‍ചോ ഗ്യെല്‍ഷെന്‍ നേടിയ ഇരട്ട ഗോളില്‍ ആദ്യ പകുതിയില്‍ തന്നെ മിനെര്‍വ മുന്നില്‍ കുതിച്ചു. കളി തീരാന്‍ നിമിഷങ്ങള്‍ മാത്രമുള്ളപ്പോള്‍ ഒബുമെന്‍മെ ബഗാന് ആശ്വസ ഗോള്‍ സമ്മാനിച്ച് പരാജയ ഭാരം കുറച്ചു.