കല്‍പ്പറ്റ: ചുങ്കം സെന്റ് ജോസഫ്‌സ് സ്‌കൂളിന് സമീപത്തായി തള്ളിയ മാലിന്യം നീക്കം ചെയ്തു. കല്‍പ്പറ്റ നഗരസഭ സ്ഥാപിച്ച മാലിന്യം നിക്ഷേപിക്കരുതെന്ന ബോര്‍ഡിന് സമീപം വന്‍തോതില്‍ മാലിന്യം നിക്ഷേപിച്ചത് കഴിഞ്ഞ ദിവസം സുപ്രഭാതം പത്രം റിപ്പോര്‍ട്ട് ചെയ്തിരുന്നു. ഇന്നലെ ഉച്ചയോടെയാണ് ഈ പ്രദേശത്തുനിന്നും കല്‍പ്പറ്റ നഗരസഭയുടെ തൊഴിലാളികള്‍ മാലിന്യം നീക്കംചെയ്തത്.
രാത്രിയുടെ മറവില്‍ റോഡരികില്‍ പലസ്ഥലങ്ങളിലും മാലിന്യം തള്ളുന്നത് വ്യാപകമാണ്. ചാക്കുകളിലും മറ്റും മാലിന്യം നിറച്ച് വാഹനങ്ങളില്‍ ഇരുളിന്റെ മറവില്‍ വലിച്ചെറിയുന്നത് പതിവാണെന്ന് പ്രദേശവാസികള്‍ പറയുന്നു. നഗരസഭാ അധികൃതരെ വിവരം അറിയിച്ചാല്‍ ശാശ്വത പരിഹാരം കാണുന്നില്ലെന്നും പ്രദേശവാസികള്‍ പറഞ്ഞു. കൃത്യമായ മാലിന്യ സംസ്‌കരണ പ്ലാന്റില്ലാത്തതാണ് ഇത്തരത്തില്‍ മാലിന്യം കുന്നുകൂടാന്‍ കാരണമെന്നും നാട്ടുകാര്‍ പറയുന്നു.