എടപ്പാള്‍: കാലാവസ്ഥാ വ്യതിയാനം മൂലം കാലം തെറ്റി കണിക്കൊന്നകള്‍ പൂത്തു. വിഷുവിന്റെ വരവറിയിച്ച് മീനമാസത്തിലാണ് കണിക്കൊന്നകള്‍ പൂത്തുലയാറുള്ളതെങ്കില്‍ ഇത്തവണ മകരമാസത്തില്‍ തന്നെ കണിക്കൊന്നകള്‍ പൂത്തു.
ജില്ലയുടെ വിവിധ ഭാഗങ്ങളില്‍ പ്രത്യേകിച്ച് എടപ്പാള്‍, ചങ്ങരംകുളം,കുറ്റിപ്പുറം ഭാഗങ്ങളിലാണ് കണിക്കൊന്നകള്‍ വ്യാപകമായി പൂത്തത്. മീനമാസത്തെ വെല്ലുന്ന ചൂടാണ് ഇക്കുറി കൊന്നകള്‍ നേരത്തെ പൂക്കാന്‍ കാരണമെന്ന് പഴമക്കാര്‍ പറയുന്നു. കഴിഞ്ഞ മൂന്ന് വര്‍ഷമായി കൊന്ന നേരത്തേ പൂക്കാറുണ്ടെണ്ടങ്കിലും ഇത്രയും നേരത്തേ പൂക്കുന്നത് ആദ്യമായാണ്. നേരത്തേ പൂത്തതിനാല്‍ വിഷുവാകുമ്പോള്‍ കണി കാണാന്‍ കണിക്കൊന്ന കിട്ടുമോ എന്ന ആശങ്കയുമുണ്ട്.