മുംബൈ: സീനിയര്‍ താരങ്ങള്‍ക്കു പിന്നാലെ ഇന്ത്യയുടെ യുവ താരങ്ങളും ഇംഗ്ലണ്ടിനെതിരായ ഏകദിന പരമ്പര സ്വന്തമാക്കി. ഇന്ത്യയും ഇംഗ്ലണ്ടും തമ്മിലുള്ള അണ്ടര്‍ 19 ഏകദിന പരമ്പരയിലെ നാലാം മത്സരത്തില്‍ നേടിയ 230 റണ്‍സിന്റെ കൂറ്റന്‍ ജയത്തോടെയാണു അഞ്ചു മത്സരങ്ങളടങ്ങിയ പരമ്പര ഇന്ത്യ 3-1നു സ്വന്തമാക്കിയത്. ആദ്യം ബാറ്റു ചെയ്ത ഇന്ത്യ നിശ്ചിത 50 ഓവറില്‍ ഒന്‍പതു വിക്കറ്റ് നഷ്ടത്തില്‍ 382 റണ്‍സ് അടിച്ചെടുത്തപ്പോള്‍ ഇംഗ്ലണ്ടിന്റെ പോരാട്ടം 37.4 ഓവറില്‍ വെറും 152 റണ്‍സില്‍ അവസാനിച്ചു.

ടോസ് നഷ്ടപ്പെട്ട് ആദ്യം ബാറ്റു ചെയ്ത ഇന്ത്യയ്ക്കായി ഷബ്മാന്‍ ഗില്ലും പ്രിഥ്വി ഷായും ഉജ്ജ്വല സെഞ്ച്വറികളുമായി കളം നിറഞ്ഞു. തുടര്‍ച്ചയായ രണ്ടാം മത്സരത്തിലാണു ഗില്‍ ശതകം നേടുന്നത്. ഗില്‍ 120 പന്തില്‍ 23 ഫോറും ഒരു സിക്‌സും പറത്തി 160 റണ്‍സെടുത്തപ്പോള്‍ പ്രഥ്വി 89 പന്തില്‍ 12 ഫോറും രണ്ടു സിക്‌സും അടിച്ച് 105 റണ്‍സിലെത്തി. രണ്ടാം വിക്കറ്റില്‍ ഗില്ലും ഷായും 231 റണ്‍സിന്റെ കൂട്ടുകെട്ട് പടുത്തുയര്‍ത്തിയാണു ഇന്ത്യയെ കൂറ്റന്‍ സ്‌കോറിലേക്ക് നയിച്ചത്. ഇരുവരും പുറത്തായ ശേഷം സ്‌കോറിങിന്റെ വേഗവും കുറഞ്ഞു. ക്ഷണത്തില്‍ വിക്കറ്റുകള്‍ നഷ്ടമായതോടെ ഇന്ത്യയുടെ സ്‌കോര്‍ 400 കടന്നില്ല. സഹ ഓപണറും നായകനുമായ ഹിമാന്‍ഷു റാണ 33 റണ്‍സെടുത്തു.

വിജയം തേടിയിറങ്ങിയ ഇംഗ്ലണ്ട് കേവലം 37.4 ഓവറില്‍ 152 റണ്‍സില്‍ കൂടാരം കയറി. ഇംഗ്ലണ്ടിന്റെ ആദ്യ നാലു ബാറ്റ്‌സ്മാന്‍മാര്‍ ഒറ്റയക്കത്തില്‍ പുറത്തായി. 41 റണ്‍സെടുക്കുമ്പോഴേക്കും അവര്‍ക്ക് നാലു മുന്‍നിര വിക്കറ്റുകള്‍ നഷ്ടമായി. മധ്യനിരയില്‍ ഒല്ലി പോപ് (59) വില്‍ ജാക്‌സ് (44) എന്നിവര്‍ പിടിച്ചു നില്‍ക്കാന്‍ ശ്രമിച്ചു. ഇരുവരുടേയും ചെറുത്തു നില്‍പ്പാണു ഇംഗ്ലണ്ട് സ്‌കോര്‍ 150 കടത്തിയത്. 17 റണ്‍സെടുത്ത മാക്‌സ് ഹോള്‍ഡനാണു രണ്ടക്കം കടന്ന മറ്റൊരു താരം.

നാലു വിക്കറ്റ് വീഴ്ത്തി കമലേഷ് നഗര്‍കോടി മൂന്നു വിക്കറ്റെടുത്ത വിവേകാനന്ദ് തിവാരി രണ്ടു വിക്കറ്റെടുത്ത ശിവം മാവി എന്നിവര്‍ ഇന്ത്യക്കായി മികച്ച ബൗളിങ് പുറത്തെടുത്തു.