കൊല്ലം: നെടുമ്പനയില്‍ മുന്നോട്ടെടുക്കുന്നതിനിടെ നിയന്ത്രണം വിട്ട കാര്‍ ആറ്റിലേക്ക് വീണ് കാറിലുണ്ടായിരുന്ന മൂന്നു പേര്‍ക്ക് പരുക്കേറ്റു. കാറിനുള്ളില്‍ കുടുങ്ങിയവരെ കാറിന്റെ ഗ്ലാസ് തകര്‍ത്താണ് രക്ഷപ്പെടുത്തിയത്. പള്ളിമണ്‍ വട്ടവിള സ്വദേശികളായ ഷൈന്‍ലാല്‍ (35) സുനില്‍ (34) മഹേഷ് (38) എന്നിവര്‍ക്കാണ് പരിക്കേറ്റത്.
ഇന്നലെ വൈകിട്ട് മൂന്നരയോടെകണ്ണനല്ലൂര്‍ വടക്കേ മുക്ക് മീയണ്ണൂര്‍ റോഡില്‍ പള്ളിമണ്‍ പാലത്തിനടുത്തെ പമ്പ് ഹൗസിന് സമീപത്തായിരുന്നു സംഭവം. ആറ്റിന് സമീപംകാര്‍ പാര്‍ക്ക് ചെയ്ത്, മൂവരും കാറിനുള്ളിലിരുന്ന് സംസാരിച്ച ശേഷം കാര്‍ വേഗത്തില്‍മുന്നോട്ട് എടുക്കാന്‍ ശ്രമിക്കുന്നതിനിടയില്‍ ഗിയര്‍ മാറി കാര്‍ പുറകോട്ട് പോയി ആറ്റില്‍ വീഴുകയായിരുന്നു. പാലത്തിനടുത്തുണ്ടായിരുന്ന രണ്ട് പേര്‍ ആറ്റിലേക്ക് ചാടി കാറിന്റെ ഗ്ലാസ് തകര്‍ത്താണ് ഇവരെ പുറത്തെടുത്തത്. വിവരമറിഞ്ഞ് ചാത്തന്നൂര്‍ പൊലിസും സ്ഥലത്തെത്തി.