കോഴിക്കോട്: വഴിയോര കച്ചവടം നിയമ പരിരക്ഷയുള്ള മേഖലയായി വളര്‍ത്തുമെന്നും ഇവരുടെ തികഞ്ഞ സംരക്ഷണം സര്‍ക്കാരിന്റെ ഉത്തരവാദിത്തമാണെന്നും ഭക്ഷ്യ-സിവില്‍ സപ്ലൈസ് മന്ത്രി പി. തിലോത്തമന്‍.
പൊലിസ് വഴിയോരക്കച്ചവടക്കാരുടെ മേല്‍ കുതിര കയറുന്നത് അജ്ഞത കൊണ്ടാണ്. നിരോധിത മേഖലയിലാണ് വഴിയോര കച്ചവടം നടത്തുന്നതെങ്കില്‍ അനുയോജ്യമായ സ്ഥലം കണ്ടെത്തി അവരെ പുനരധിവസിപ്പിച്ചതിന് ശേഷം മാത്രമേ ഒഴിപ്പിക്കാന്‍ പാടുള്ളൂവെന്നാണ് 2014 ലെ നിയമത്തില്‍ പറയുന്നത്.
വഴിയോര കച്ചവടക്കാരെ സംബന്ധിച്ച നിയമം നടപ്പാക്കുന്നതിനുള്ള നടപടികള്‍ പൂര്‍ത്തീകരിച്ചു വരുന്നുണ്ട്. നിയമം പ്രാബല്യത്തില്‍ വന്നാല്‍ പ്രസ്തുത നിയമം നടപ്പാക്കുന്ന രാജ്യത്തെ ആദ്യ സംസ്ഥാനമായി കേരളം മാറുമെന്നും, ഇതിനാവശ്യമായ സര്‍വേ സര്‍ക്കാര്‍ പുനരാരംഭിച്ചിട്ടുണ്ടെന്നും മന്ത്രി കൂട്ടിച്ചേര്‍ത്തു.
കേരള സംസ്ഥാന വഴിയോര കച്ചവട തൊഴിലാളി ഫെഡറേഷന്‍(എ.ഐ.ടി.യു.സി) സംസ്ഥാന സമ്മേളനത്തോടനുബന്ധിച്ച് നടന്ന വഴിയോര കച്ചവട തൊഴിലാളികളും പൊതുസമൂഹവും സെമിനാര്‍ ടൗണ്‍ ഹാളില്‍ ഉദ്ഘാടനം ചെയ്യുകയായിരുന്നു അദ്ദേഹം.
സ്വാഗത സംഘം ചെയര്‍മാന്‍ കെ.ജി പങ്കജാക്ഷന്‍ അധ്യക്ഷനായി. ഫെഡറേഷന്‍ പ്രസിഡന്റ് ടി. ജെ ആഞ്ചലോസ്, സി.പി.ഐ ജില്ലാ സെക്രട്ടറി ടി.വി ബാലന്‍, പി.എ ജിറാര്‍, അഡ്വ. പി. ഗവാസ്, എലിസബത്ത് മണി സംസാരിച്ചു. ചടങ്ങിനോടനുബന്ധിച്ച് കൃഷ്ണന്‍ അരീക്കോടും സിനിദാസ് അരീക്കോടും അവതരിപ്പിച്ച സംഗീത ശില്‍പവും, ബാബു ഒലിപ്രം അവതരിപ്പിച്ച ഏകപാത്ര നാടകവും അരങ്ങേറി.
ഇന്ന് നടക്കുന്ന പ്രതിനിധി സമ്മേളനം കെ.പി രാജേന്ദ്രന്‍ ഉദ്ഘാടനം ചെയ്യും.