തലശ്ശേരി: തലശ്ശേരി പുതിയ ബസ് സ്റ്റാന്‍ഡ് പരിസരത്ത് നട്ടു വളര്‍ത്തിയ നിലയില്‍ കഞ്ചാവ് ചെടി കണ്ടെത്തി. വിവരം എക്‌സൈസ് സംഘത്തെ അറിയിച്ചയാളെ പിന്നീട് കണ്ടെത്താനായില്ല. സംഭവത്തില്‍ എക്‌സൈസ് സംഘം അന്വേഷണം തുടങ്ങി.
ഇന്നലെ രാവിലെ 11.30ഓടെ തലശ്ശേരി എക്‌സൈസ് ഇന്‍സ്‌പെക്ടര്‍ ടി.എസ് സെല്‍വകുമാറും സംഘവും പട്രോളിങ് നടത്തുന്നതിനിടെ പുതിയ ബസ് സ്റ്റാന്‍ഡില്‍ ഒരാള്‍ ഇവര്‍ സഞ്ചരിച്ച ജീപ്പ് കൈകാട്ടി നിര്‍ത്തി ബസ് സ്റ്റാന്റിന് സമീപത്തെ പച്ചക്കറി മാര്‍ക്കറ്റിന് പിറകില്‍ കഞ്ചാവ് ചെടിയുണ്ടെന്ന് അറിയിക്കുകയായിരുന്നു. ഉടന്‍ ജീപ്പ് നിര്‍ത്തി എക്‌സൈസ് സംഘം പരിശോധന നടത്തുകയും ചെടി കണ്ടെത്തുകയും ചെയ്തു. തുടര്‍ന്ന് കഞ്ചാവ് നട്ടുവളര്‍ത്തുന്ന വിവരം അറിയിച്ചയാളെ എക്‌സൈസ് സംഘം അന്വേഷിച്ചെങ്കിലും കണ്ടെത്താനായില്ല. ഇയാള്‍ സ്ഥലത്തു നിന്നു രക്ഷപ്പെട്ടതു ദുരൂഹത ഉയര്‍ത്തിയിട്ടുണ്ട്.
പുതിയ ബസ് സ്റ്റാന്റിനു സമീപത്തെ പച്ചക്കറി മാര്‍ക്കറ്റിന് പിന്നിലെ റെയില്‍വേ ട്രാക്ക് പരിസരത്തെ പൂട്ടിയിട്ട വീടിന്റെ മുറ്റത്താണ് വളര്‍ന്ന് വലുതായ ഒരു കഞ്ചാവ് ചെടി കണ്ടെത്തിയത.്
എക്‌സൈസ് സംഘം ഇത് പിഴുതെടുത്ത് കൊണ്ടുപോയി. സംഭവം അറിഞ്ഞ് നിരവധിയാളുകള്‍ സ്ഥലത്ത് തടിച്ച് കൂടിയിരുന്നു. കഞ്ചാവ് ചെടി വടകര നാര്‍ക്കോട്ടിക് കോടതിയില്‍ ഹാജരാക്കി.