തൃശൂര്‍: ജോലികഴിഞ്ഞ് വീട്ടിലേക്ക് മടങ്ങുന്നതിനിടെ ജീവന്‍ ടി.വി ക്യാമറമാന്‍ രാകേഷിനെ തടഞ്ഞു നിര്‍ത്തി അകാരണമായി മര്‍ദ്ദിക്കുകയും അസഭ്യം പറയുകയും മാധ്യമ സമൂഹത്തെ വെല്ലുവിളിക്കുകയും ചെയ്ത കൊടുങ്ങല്ലൂര്‍ എസ്.ഐ ബി.രാജഗോപിലിനെതിരേ നടപടിയെടുക്കണമെന്ന് കേരള പത്രപ്രവര്‍ത്തക യൂനിയന്‍ തൃശൂര്‍ ജില്ലാ കമ്മിറ്റി ആവശ്യപ്പെട്ടു. വെള്ളിയാഴ്ച രാത്രിയാണ് കൊടുങ്ങല്ലൂര്‍ എടവിലങ്ങില്‍ വെച്ച് രാകേഷിനെ തടയുകയും മാധ്യമ പ്രവര്‍ത്തകനാണെന്നും ജോലി കഴിഞ്ഞ് മടങ്ങുകയാണെന്ന് അറിയിച്ചിട്ടും എസ്.ഐ മര്‍ദിച്ചത്.
മാധ്യമ പ്രവര്‍ത്തകര്‍ക്ക് നേരെയുള്ള ഇത്തരം ആക്രമണങ്ങള്‍ നിരുത്തരവാദപരവും പ്രതിഷേധാര്‍ഹവുമാണെന്ന് പ്രസ് ക്ലബ്ബ് പ്രസിഡന്റ് സന്തോഷ് ജോണ്‍ തൂവലും സെക്രട്ടറി കെ.സി. അനില്‍കുമാറും പ്രതിഷേധക്കുറിപ്പില്‍ അറിയിച്ചു. തൃശൂര്‍ റേഞ്ച് ഐ.ജിക്കും എസ്.പിക്കും എസ്.ഐക്കെതിരേ നടപടി ആവശ്യപ്പെട്ട് പരാതി നല്‍കിയിട്ടുണ്ട്.