ജിദ്ദ: താമസസ്ഥലത്തു കയറി വിദേശിയെ ആക്രമിച്ച് പണവും മൊബൈല്‍ ഫോണുകളും തട്ടിയെടുത്ത് രക്ഷപ്പെട്ട അഞ്ചംഗ സംഘത്തെ ജിദ്ദ പോലീസ് അറസ്റ്റ് ചെയ്തു. പ്രതികളെല്ലാവരും സ്വദേശി വംശജരാണ്.

കഴിഞ്ഞയാഴ്ചയാണ് സംഭവം. ഡ്രൈവറായി ജോലി ചെയ്യുന്ന വിദേശിയുടെ താമസസ്ഥലത്ത് അതിക്രമിച്ചു കയറിയ സംഘം വിദേശിയെ കുത്തിപ്പരുക്കേല്‍പിച്ച് കെട്ടിയിട്ട് പണവും മൊബൈല്‍ ഫോണുകളും കവര്‍ന്ന് രക്ഷപ്പെടുകയായിരുന്നു. ഡ്രൈവറുടെ സ്‌പോണ്‍സര്‍ അല്‍സലാമ പൊലിസ് സ്റ്റേഷനില്‍ നല്‍കിയ പരാതിയുടെ അടിസ്ഥാനത്തില്‍ പ്രത്യേക സംഘം രൂപീകരിച്ച് നടത്തിയ അന്വേഷണത്തിലാണ് കഴിഞ്ഞ ദിവസം പ്രതികള്‍ വലയിലായത്.

ചോദ്യം ചെയ്യലില്‍ ഇവര്‍ കുറ്റസമ്മതം നടത്തിയതായി മക്ക പ്രവിശ്യ പൊലിസ് വക്താവ് കേണല്‍ ആത്തി അല്‍ഖുറശി പറഞ്ഞു.
സമാനമായ മറ്റൊരു സംഭവത്തില്‍ ജിദ്ദയില്‍ പൊലിസ് ചമഞ്ഞ് വിദേശികളുടെ പണവും വിലപിടിച്ച വസ്തുക്കളും പിടിച്ചുപറിക്കുന്നത് പതിവാക്കിയ രണ്ടു സഊദി യുവാക്കളെ പൊലിസ് കഴിഞ്ഞ ദിവസം അറസ്റ്റ് ചെയ്തിരുന്നു.

വ്യാപാര സ്ഥാപനങ്ങളില്‍ കയറിയാണ് സംഘം വിദേശികളെ ആക്രമിച്ച് പണം തട്ടിയിരുന്നത്. ഏതാനും വിദേശികള്‍ സംഘത്തിന്റെ ആക്രമണത്തിന് വിധേയരായിരുന്നു. ഇവര്‍ പരാതികള്‍ നല്‍കിയതിനെ തുടര്‍ന്ന് നടത്തിയ അന്വേഷണത്തിലാണ് പ്രതികള്‍ അറസ്റ്റിലായത്.