കേപ്ടൗണ്‍: ശ്രീലങ്കയ്‌ക്കെതിരായ ഏകദിന പരമ്പരയിലെ നാലാം മത്സരത്തിലും ദക്ഷിണാഫ്രിക്കയ്ക്ക് തകര്‍പ്പന്‍ ജയം. 40 റണ്‍സിന്റെ ജയമാണ് ദക്ഷിണാഫ്രിക്ക സ്വന്തമാക്കിയത്. ദക്ഷിണാഫ്രിക്കയുടെ 368 റണ്‍സിന്റെ വിജയലക്ഷ്യം പിന്തുടര്‍ന്ന ശ്രീലങ്ക 327ന് പുറത്താവുകയായിരുന്നു.
ഉപുല്‍ തരംഗ(119) ടീമിനായി സെഞ്ച്വറി നേടിയെങ്കിലും ടീമിനെ വിജയത്തിലേക്ക് നയിക്കാനായില്ല. സന്ദുന്‍ വീരകോടി(58) നിരോഷന്‍ ഡിക്‌വെല്ല(58) എന്നിവരാണ് മറ്റു പ്രധാന സ്‌കോറര്‍മാര്‍. മറ്റുള്ളവര്‍ വേണ്ടത്ര മികവിലേക്കുയരാനായില്ല.
90 പന്തില്‍ 11 ബൗണ്ടറിയും ഏഴു സിക്‌സറും പറത്തിയാണ് തരംഗ സെഞ്ച്വറി തികച്ചത്. നേരത്തെ ഫാഫ് ഡുപ്ലെസി(185)യുടെ സെഞ്ച്വറിയാണ് ദക്ഷിണാഫ്രിക്കയ്ക്ക് കൂറ്റന്‍ സ്‌കോര്‍ സമ്മാനിച്ചത്. 141 പന്ത് നേരിട്ട ഡുപ്ലെസി 16 ബൗണ്ടറിയും മൂന്നു സിക്‌സറും പറത്തി. ക്വിന്‍ണ്‍ ഡി കോക്ക്(55) എ.ബി ഡിവില്ല്യേഴ്‌സ്(64) എന്നിവര്‍ അര്‍ധ സെഞ്ച്വറി നേടി.