അമ്പൂരി:അഗസ്ത്യവനത്തിലെ ഉള്‍ഭാഗങ്ങളില്‍ കാട്ടുതീ പടരുന്നു. ഇന്നലെ രാത്രി പിടിച്ച കാട്ടുതീ മറ്റ് ഭാഗങ്ങളിലേയ്ക്ക് പടര്‍ന്ന് പുല്‍മേടുകള്‍ കത്തിയമര്‍ന്നതായി സൂചനയുണ്ട്. വിവരം വനം വകുപ്പിനെ ആദിവാസികള്‍ അറിയിക്കുകയായിരുന്നു.

നാച്ചിയാര്‍മൊട്ട, വരയാട്ടുമൊട്ട, എന്നിവിടങ്ങളിലാണ് ആദ്യം തീ കണ്ടത്. അഗസ്ത്യമുടിയ്ക്ക് കീഴെയുള്ള പുല്‍മേടുകളില്‍ തീ പടര്‍ന്നത് അതിനുശേഷമാണ്. അണകാല്‍ ആദിവാസി കോളനിയ്ക്ക് അടുത്താണ് പിന്നീട് കാട്ടുതീ കാണപ്പെട്ടത്.15 കിലോമീറ്റര്‍ അകലെ തീര്‍ത്ഥകരയ്ക്ക് അടുത്തുള്ള പുല്‍മേടുകള്‍, പുലിവിഴുന്നചൊന,കതിരുമുടി തുടങ്ങി വിവിധ ഭാഗങ്ങളില്‍ കാട്ടുതീ പടരുന്നുണ്ട്. പുല്‍മേടുകള്‍ക്ക് പുറമേ നിത്യഹരിത വനത്തിലേയ്ക്കും തീ പടരാന്‍ ഇടയുള്ളതായി ചൂണ്ടിക്കാട്ടുന്നു.

കാട്ടുമൃഗങ്ങളുടെ ആവാസകേന്ദ്രങ്ങള്‍ കൂടിയാണ് ഈ ഭാഗങ്ങള്‍. ആന, കാട്ടുപോത്ത്, കരടി,സിംഹവാലന്‍ കുരങ്ങ് തുടങ്ങി നിരവധി വന്യജീവികള്‍ക്കും ഭീഷണിയായിരിക്കുകയാണ് കാട്ടുതീ. വിറളി പിടിച്ചോടുന്ന കാട്ടുമൃഗങ്ങള്‍ കൂട്ടമായി ആദിവാസികേന്ദ്രങ്ങളില്‍ എത്തുമോ എന്ന ആശങ്കയുമുണ്ട്.

അഗസ്ത്യവനത്തിലെ പുല്‍മേടുകള്‍ ജലേ്രസാതസുകളുടെ പ്രഭവകേന്ദ്രമാണെന്നും അഗസ്ത്യമുടിയില്‍നിന്നും ഉത്ഭവിക്കുന്ന നെയ്യാര്‍, കരമനയാര്‍ തുടങ്ങിയ വന്‍ നദികളുടെയും അസംഖ്യം ചെറുനദികളുടെയും സംഭരണസ്രോതസുകളാണെന്നും വര്‍ഷങ്ങള്‍ക്ക് മുന്‍പേ ശാസ്ത്രസംഘം കണ്ടെത്തിയിരുന്നു.

പുല്‍മേടുകള്‍ നിത്യഹരിതവനത്തെപ്പോലെ സംരക്ഷിക്കണമെന്നും കാട്ടുതീ പടരുന്നത് തടയാന്‍ നടപടിവേണമെന്നും നിര്‍ദേശിച്ചിരുന്നു. പുല്‍മേടുകളില്‍ അന്യം നിന്നുപോയ നെല്ലിനം കണ്ടെത്തിയിരുന്നു. മാനിലയിലെ നെല്‍ ഗവേഷണകേന്ദ്രത്തിലെത്തിച്ച ഈ ഇനം പിന്നീട് അത്യുല്‍പ്പാദനശേഷിയുള്ള നെല്ല് ഇനമായി മാറുകയും ചെയ്തു.

നിരവധി ഭക്ഷ്യവിളകളുടെ തായ്‌വേര് അടങ്ങിയിട്ടുള്ള പുല്‍മേടുകള്‍ അടക്കമുള്ളവ കത്തിയമരുകയാണ്. ഭാവിയില്‍ വന്‍ജലക്ഷാമത്തിന് വരെ വഴി തെളിച്ചേയ്ക്കാവുന്ന ഒന്നായി കാട്ടുതീ മാറുമെന്നും വിദഗ്ധര്‍ പറയുന്നു.
തീ മന:പൂര്‍വം പടര്‍ത്തിയതാകാമെന്നും സംശയിക്കുന്നുണ്ട്. മൃഗവേട്ടയ്ക്കും വൈഡൂര്യഖനനത്തിനും എത്തുന്നവരാകാം എന്നാണ് സംശയിക്കുന്നത്. ആദിവാസികളും വേട്ടക്കു മുന്‍പ് തീ ഇടാറുണ്ട്. അനുമതിയില്ലാതെ അഗസ്ത്യവനദര്‍ശനത്തിന് രഹസ്യമായി പോകുന്ന സംഘങ്ങളെയും ചിലര്‍ ചൂണ്ടിക്കാട്ടുന്നു. പാണ്ടിക്കാറ്റിന്റെ സമയമാണിത്. തീ പെട്ടെന്ന് പടര്‍ന്ന് പിടിക്കും. എന്നിട്ടും വനംവകുപ്പ് ഒരു നടപടിയും എടുത്തിട്ടില്ല.
തീ പിടിക്കുന്നത് ഉള്‍ക്കാട്ടില്‍ ആയതിനാല്‍ ആരും അറിയില്ലെന്ന് കരുതി മൂടിവയ്ക്കാനാണ് ശ്രമിക്കാറ്. ഉള്‍ക്കാട് ആയതിനാല്‍ തീ പടര്‍ന്നത് അന്വേഷിക്കാന്‍ പോലും ആരും പോകാറില്ല.