റിയാദ്: സഊദി കിരീടാവകാശിയുടെ നേതൃത്വത്തില്‍ രൂപീകരിച്ച അഴിമതി വിരുദ്ധ സമിതിയുടെ നേതൃത്വത്തില്‍ പിടികൂടി തുറുങ്കിലടക്കപ്പെട്ട പ്രമുഖരില്‍ ഏതാനും പേര്‍ കൂടി പുറത്തിറങ്ങിയതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.
പിടികൂടിയതിനുശേഷം ഇവരെ താമസിപ്പിച്ചിരുന്ന റിയാദിലെ റിത്സ് കാള്‍ട്ടന്‍ ഹോട്ടലില്‍നിന്നാണ് ഇവരെ വിട്ടയച്ചതെന്നും സഊദി ഭരണകൂടം ആവശ്യപ്പെട്ട അഴിമതിപ്പണം ഖജനാവിലേക്ക് തിരിച്ചടച്ചാണ് ഇവര്‍ പുറത്തിറങ്ങിയതെന്നും റിപ്പോര്‍ട്ടില്‍ വ്യക്തമാക്കി. പുറത്തിറങ്ങിയവരില്‍ നേരത്തെ സര്‍ക്കാര്‍തലങ്ങളില്‍ ഉന്നത നിലയില്‍ ജോലി ചെയ്തിരുന്ന ഉദ്യോഗസ്ഥന്‍ അടക്കമുള്ളവര്‍ ഉള്‍പ്പെട്ടിട്ടുണ്ട്. സര്‍ക്കാര്‍ ആവശ്യം ഇവര്‍ അംഗീകരിച്ചതിനെ തുടര്‍ന്ന് പബ്ലിക് പ്രോസിക്യൂട്ടര്‍ ആണ് ഇവര്‍ക്കു മോചനം നല്‍കിയയത്.
വരുംദിവസങ്ങളില്‍ ഇത്തരത്തില്‍ കൂടുതല്‍ പേരെ വിട്ടയക്കുമെന്നാണു കരുതുന്നത്. ഇതിനായി മറ്റുള്ളവരുടെയും മോചനകാര്യം പരിഗണയിലാണ്. സര്‍ക്കാര്‍ ആവശ്യപ്പെടുന്ന പണം പൊതുഖജനാവിലേക്കു തിരിച്ചടക്കാന്‍ സന്നദ്ധമായാല്‍ ഇവര്‍ക്കു പുറത്തിറങ്ങാമെന്നു ബന്ധപ്പെട്ട വൃത്തങ്ങള്‍ വെളിപ്പെടുത്തി.
ലോകത്തെ മുന്‍നിര കോടീശ്വരനും പശ്ചിമേഷ്യയിലെയും സഊദിയിലെയും ഏറ്റവും സമ്പന്നനുമായ വലീദ് ബിന്‍ തലാല്‍ രാജകുമാരനും തനിക്കെതിരേയുള്ള കേസ് ഒത്തുതീര്‍ക്കുന്നതിനുള്ള ചര്‍ച്ചയിലാണ്. എന്നാല്‍, ഒത്തുതീര്‍പ്പ് ചര്‍ച്ച പ്രകാരം ഖജനാവിലേക്കു തിരിച്ചടക്കേണ്ട പണത്തിന്റെ കാര്യത്തില്‍ ധാരണയിലെത്താന്‍ ഇരു വിഭാഗത്തിനും സാധിക്കാത്തതാണു മോചനം നീണ്ടുപോകാന്‍ കാരണം.
പശ്ചിമേഷ്യയിലെ ഏറ്റവും വലിയ നിര്‍മാണ കമ്പനിയായ സഊദി ബിന്‍ ലാദിന്‍ ഗ്രൂപ്പ് ചെയര്‍മാന്‍ ബക്ര്‍ ബിന്‍ ലാദിനും ഒത്തുതീര്‍പ്പു ചര്‍ച്ചയിലാണ്. കമ്പനിയിലെ തന്റെ ഓഹരികള്‍ സര്‍ക്കാരിനു നല്‍കി ഒത്തുതീര്‍പ്പാക്കാനാണു ശ്രമം നടക്കുന്നത്.
കേസില്‍ അറസ്റ്റിലായവരില്‍ 95 ശതമാനവും അവിഹിതമാര്‍ഗത്തിലൂടെയെന്ന് സര്‍ക്കാര്‍ കണ്ടെത്തിയ പണം പൊതുഖജനാവിലേക്കു തിരിച്ചടച്ചു മോചനം നേടാന്‍ സന്നദ്ധത പ്രകടിപ്പിച്ചിട്ടുണ്ട്. ഈ തുക തിരിച്ചടച്ചവര്‍ മോചിതരാകുകയും ചെയ്തിട്ടുണ്ട്.
ബാക്കിയുള്ളവര്‍ തങ്ങള്‍ക്കെതിരായ കേസുകള്‍ കോടതിയില്‍ നേരിടാനാണ് ഒരുങ്ങുന്നത്. പ്രതികളുമായുള്ള ഒത്തുതീര്‍പ്പു ധാരണയിലൂടെ ഏകദേശം 37,500 കോടി റിയാല്‍ പൊതുഖജനാവിലേക്ക് തിരിച്ചെത്തിക്കാന്‍ കഴിയുമെന്നാണു സര്‍ക്കാര്‍ കണക്കാക്കുന്നത്.