പട്ടിക്കാട്: നിലമ്പൂര്‍ പെരുമ്പിലാവ് സംസ്ഥാന പാതയോരത്ത് പ്രവര്‍ത്തിക്കുന്ന താഴെ പൂപ്പലം മത്സ്യ മൊത്തവിതരണ മാര്‍ക്കറ്റിന് സമീപം തരിശുപാടത്ത് തീപിടിത്തം. ഇന്നലെ രാവിലെ 11.30 ഓടെയാണ് മത്സ്യമാര്‍ക്കറ്റിന് പിറകുവശത്ത് നിക്ഷേപിച്ച മാലിന്യത്തില്‍നിന്ന് തീ പടര്‍ന്നത്.
തൊട്ടടുത്തുകൂടി കടന്നുപോകുന്ന നിലമ്പൂര്‍ ഷൊര്‍ണൂര്‍ റെയില്‍പാതക്ക് സമീപത്തേക്കും തീ പടര്‍ന്നു. വര്‍ഷങ്ങളായി കൃഷിയിറക്കാതെ തരിശായിക്കിടക്കുന്ന പാടത്തേക്ക് മാര്‍ക്കറ്റിലെയും പുറത്തുനിന്നുമുള്ള മാലിന്യം തള്ളുന്നത് പതിവാണ്. മാര്‍ക്കറ്റിലേക്ക് മത്സ്യവും ഐസും കൊണ്ടുവരുന്ന തെര്‍മോകോള്‍ പെട്ടികള്‍ പ്രദേശത്ത് കൂട്ടിയിട്ടിരുന്നു.
ഇതിലേക്ക് പടര്‍ന്നതോടെ പ്രദേശത്ത് അസാധാരണമാംവിധം കറുത്ത പുകയുയര്‍ന്നത് പരിഭ്രാന്തി പരത്തി. റെയില്‍വേ ട്രാക്കിലേക്കും പുക പടര്‍ന്നു കയറി.
പുക കാഴ്ച മറച്ചതോടെ ഈ സമയം ഇതിലൂടെ വളരെ പതിയെയാണ് ട്രെയിന്‍ കടന്നുപോയത്. റെയില്‍പാതയോരത്തും സമീപത്തുമുള്ള മരങ്ങളും പുല്‍ക്കാടുകളും കത്തിനശിച്ചു. അഗ്ശമനസേന എത്തി ഉച്ചക്ക് ഒരു മണിയോടെയാണ് തീയണച്ചത്.