ന്യൂഡല്‍ഹി: ആണവ വാഹക ശേഷിയുള്ള ഭൂഖണ്ഡാതര ബാലിസ്റ്റിക് മിസൈലായ അഗ്നി-5 ഇന്ത്യ വിജയകരമായി പരീക്ഷിച്ചു. ഒഡീഷ തീരത്തുള്ള അബ്ദുള്‍ കലാം ദ്വീപില്‍ നിന്നായിരുന്നു പരീക്ഷണം.

5,000ലധികം കി.മീറ്റര്‍ ദൂരെയുള്ള ലക്ഷ്യം ഭേദിക്കാന്‍ കഴിയുന്ന മിസൈലിന് ഒരു ടണ്ണിലേറെ ഭാരമുള്ള ആണവ പോര്‍മുനകളെ വഹിക്കാന്‍ കഴിയും. 17 മീറ്റര്‍ നീളവും 50 ടണ്ണിലേറെ ഭാരവുമാണുള്ളത്. മിസൈല്‍ വിക്ഷേപണം വിജയകരമാണെന്ന് പ്രതിരോധമന്ത്രി നിര്‍മലാ സീതാരാമന്‍ സ്ഥിരീകരിച്ചു.

2016 ഡിസംബര്‍ 26 നാണ് അഗ്നി-5 അവസാനമായി പരീക്ഷിച്ചത്. അമേരിക്ക, റഷ്യ, ചൈന, ഫ്രാന്‍സ്, ബ്രിട്ടന്‍ എന്നീ രാജ്യങ്ങള്‍ക്കാണ് ഇത്തരം മിസൈലുകള്‍ സ്വന്തമായുള്ളത്.