കൊല്‍ക്കത്ത: കനത്ത മൂടല്‍ മഞ്ഞുകാരണം മുന്നോട്ടുകാണാനാകാതെ നിയന്ത്രണം വിട്ട് ബസ് മറിഞ്ഞ് യാത്രക്കാരായ ഒന്‍പതുപേര്‍ മരിച്ചു. 20 യാത്രക്കാര്‍ക്ക് പരുക്കേറ്റു. മുര്‍ഷിദാബാദ് ജില്ലയിലെ ബേഗുന്‍ബരിയിലായിരുന്നു അപകടം.
ഇന്നലെ പുലര്‍ച്ചെ 3.45ന് അംതാലയില്‍ നിന്ന് ബെര്‍ഹാംപൂരിലേക്ക് പുറപ്പെട്ട ബസില്‍ 50 യാത്രക്കാരാണ് ഉണ്ടായിരുന്നത്. ഇവരില്‍ കൂടുതല്‍പേരും തൊഴിലാളികളായിരുന്നു. കനത്ത മഞ്ഞുകാരണം മുന്നോട്ടുകാണാനാകുമായിരുന്നില്ല.
ഇതിനിടയില്‍ ബസ് അമിത വേഗത്തിലുമായിരുന്നുവെന്ന് അപകടത്തില്‍ പരുക്കേറ്റ് ആശുപത്രിയില്‍ ചികിത്സയിലുള്ള ഒരു യാത്രക്കാരന്‍ പറഞ്ഞു. നിയന്ത്രണം വിട്ട ബസ് റോഡരികിലെ കുഴിയിലേക്ക് മറിഞ്ഞാണ് അപകടമുണ്ടായത്. സാരമായി പരുക്കേറ്റവരെ മുര്‍ഷിദാബാദ് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരിക്കുകയാണ്. മരിച്ചവരുടെ കുടുംബത്തിന് രണ്ട് ലക്ഷം രൂപ അടിയന്തര ധനസഹായമായി ജില്ലാ കലക്ടര്‍ അനുവദിച്ചിട്ടുണ്ട്.