ബെയ്ജിങ്: അമേരിക്ക അനധികൃതമായി തങ്ങളുടെ സമുദ്രാതിര്‍ത്തിയില്‍ കടന്നെന്ന് ചൈന. കഴിഞ്ഞ ബുധനാഴ്ചയാണ് യു.എസ്.എസ് ഹോപ്പര്‍ എന്ന യു.എസ് യുദ്ധക്കപ്പല്‍ ദക്ഷിണ ചൈനാകടലിലെ ഹ്വാങ്‌യന്‍ ദ്വീപില്‍ അതിര്‍ത്തി ലംഘിച്ചെത്തിയത്. ചൈനയും ഫിലിപ്പൈന്‍സും ഒരുപോലെ അവകാശവാദമുന്നയിക്കുന്ന ദ്വീപാണ് ഹ്വാങ്‌യന്‍. ഉ.കൊറിയക്കെതിരായ നടപടിയില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ചൈനയുടെ പിന്തുണ തേടി രംഗത്തെത്തിയതിനു പിറകെയാണു പുതിയ സംഭവം. രാജ്യത്തിന്റെ പരമാധികാരം സംരക്ഷിക്കാനായി ആവശ്യമായ നടപടികള്‍ കൈക്കൊള്ളുമെന്ന് ചൈനീസ് വിദേശകാര്യ മന്ത്രാലയം അറിയിച്ചു. മന്ത്രാലയം വെബ്‌സൈറ്റിലൂടെയാണ് യു.എസ് കപ്പല്‍ അതിര്‍ത്തി ലംഘിച്ച കാര്യം പുറത്തുവിട്ടത്.