മുംബൈ: പ്രധാനമന്ത്രി പദത്തിലെത്തിയെന്ന ഈഗോ ആണ് നരേന്ദ്രമോദിക്കെന്ന വിമര്‍ശനവുമായി അണ്ണാ ഹസാരെ. താന്‍ കത്തയച്ചിട്ടും അതിനോട് പ്രതികരിക്കാന്‍ അദ്ദേഹം തയാറാകാത്തതിനോടുള്ള പ്രതികരണമായാണ് അദ്ദേഹം മോദിക്കെതിരേ കടുത്ത വിമര്‍ശനം ഉന്നയിച്ചത്.
മഹാരാഷ്ട്രയിലെ സാംഗ്ലി ജില്ലയില്‍ ഒരു പൊതുസമ്മേളനത്തില്‍ സംസാരിക്കുമ്പോഴായിരുന്നു ഹസാരെ മോദിക്കെതിരേ വിമര്‍ശനം ഉന്നയിച്ചത്. കഴിഞ്ഞ മൂന്നുവര്‍ഷങ്ങളില്‍ 30 കത്തുകളാണ് മോദിക്ക് താന്‍ അയച്ചത്. ഒന്നിനുപോലും മറുപടി നല്‍കാന്‍ അദ്ദേഹം തയാറായില്ല. പ്രധാനമന്ത്രി പദത്തിലെത്തിയെന്ന ഈഗോ ആണ് അദ്ദേഹം കത്തുകള്‍ക്ക് മറുപടി നല്‍കാതിരിക്കാന്‍ കാരണം. മാര്‍ച്ച് 23ന് ഡല്‍ഹിയില്‍ നടത്താനിരിക്കുന്ന പ്രതിഷേധ റാലിയില്‍ ജനപങ്കാളിത്തം ഉറപ്പാക്കുന്നതിന്റെ ഭാഗമായാണ് അദ്ദേഹം വിവിധയിടങ്ങളിലായി പൊതു സമ്മേളനം നടത്തുന്നത്.
രാജ്യം മുന്‍പൊരിക്കലും കാണാത്ത തരത്തിലുള്ള പ്രതിഷേധമായിരിക്കും മാര്‍ച്ച് 23ന് ഉണ്ടാകുകയെന്നും അദ്ദേഹം വ്യക്തമാക്കി.