കൊണ്ടോട്ടി: ദുബൈയില്‍നിന്നു കരിപ്പൂരിലെത്തിയ യുവതിയില്‍നിന്ന് 15 ലക്ഷത്തിന്റെ 524 ഗ്രാം സ്വര്‍ണം കോഴിക്കോട് കസ്റ്റംസ് പ്രിവന്റീവ് വിഭാഗം പടികൂടി.
ദുബൈയില്‍നിന്ന് ഇന്‍ഡിഗോ എയര്‍ വിമാനത്തിലെത്തിയ കോഴിക്കോട് സ്വദേശിനി സറീന (54) യില്‍നിന്നാണ് സ്വര്‍ണം കണ്ടത്തിയത്.

രഹസ്യവിവരം ലഭിച്ചതിനെ തുടര്‍ന്നു കരിപ്പൂരിലെത്തിയ കസ്റ്റംസ് പ്രിവന്റീവ്് വിഭാഗം ഗ്രീന്‍ചാനല്‍വഴി പുറത്തുകടക്കാന്‍ ശ്രമിച്ച ഇവരെ ഗേറ്റില്‍ തടഞ്ഞു പരിശോധന നടത്തുകയായിരുന്നു.
മൂന്നു സ്വര്‍ണച്ചെയിനുകള്‍ കാല്‍മുട്ടിനോടു ചേര്‍ത്തു കെട്ടിവച്ച നിലയിലും രണ്ടു സ്വര്‍ണ വളകള്‍ പ്ലാസ്റ്റിക് സ്ട്രിപ്പില്‍ പൊതിഞ്ഞു ഫാന്‍സി പേപ്പര്‍ പൊതിഞ്ഞ് ഒളിപ്പിച്ച നിലയിലുമായിരുന്നു.
കസ്റ്റംസ് പ്രിവന്റീവ്് സൂപ്രണ്ട് സി.ജെ തോമസ്, ഇന്‍സ്‌പെക്ടര്‍ കെ. മുരളീധരന്‍ എന്നിവരടങ്ങിയ സംഘമാണ് സ്വര്‍ണം പിടികൂടിയത്.