കൊല്ലം: മഞ്ചേരിയില്‍ നിന്ന് സ്‌കൂള്‍ വിദ്യാര്‍ഥികളുമായി തിരുവനന്തപുരത്തേക്ക് പഠനയാത്ര പോയ ടൂറിസ്റ്റ് ബസ് അപകടത്തില്‍പെട്ട് വിദ്യാര്‍ഥികളും ബസ് ജീവനക്കാരും ഉള്‍പ്പെടെ ആറുപേര്‍ക്ക് പരുക്ക്. ഇന്നലെ പുലര്‍ച്ചെ നാലിന് ദേശീയപാതയില്‍ കൊല്ലം ഹൈസ്‌കൂള്‍ ജങ്ഷന് സമീപത്തായിരുന്നു അപകടം.
മലപ്പുറം മഞ്ചേരി ഗവ. ബോയ്‌സ് ഹൈസ്‌കൂളിലെ പഠനയാത്രാ സംഘമാണ് ബസില്‍ ഉണ്ടായിരുന്നത്. മുന്നില്‍ പോവുകയായിരുന്ന കണ്ടെയ്‌നര്‍ ലോറി അപ്രതീക്ഷിതമായി വെട്ടിച്ചപ്പോള്‍ ലോറിയുടെ പിന്‍ഭാഗം ബസിന്റെ മുന്നില്‍ ഇടിക്കുകയായിരുന്നു. അപകടമുണ്ടായെന്നറിഞ്ഞിട്ടും ലോറി നിര്‍ത്താതെ ഓടിച്ചു പോയി. വിദ്യാര്‍ഥികളായ പി.ആര്‍. അഥില്‍, ലുബുല നഹ, പി. അനഘ, ശ്രേയ എന്നിവര്‍ക്കും ബസ് ഡ്രൈവര്‍ക്കും സഹായിക്കുമാണ് പരുക്കേറ്റത്.
ഇവരെ ജില്ലാ ആശുപത്രിയില്‍ പ്രവേശിപ്പിച്ച് പ്രഥമ ശുശ്രൂഷ നല്‍കി. അപകടത്തില്‍ ഭയന്ന കുട്ടികളുടെ നിലവിളി കേട്ട് സമീപത്തെ സി.ഐ.ടി.യു ഓഫിസിലുണ്ടായിരുന്നവരാണ് ആദ്യം രക്ഷാപ്രവര്‍ത്തനത്തിന് എത്തിയത്. അപകടത്തില്‍ ബസിന്റെ മുന്‍ഭാഗം പൂര്‍ണമായും തകര്‍ന്നു.
അപകടത്തില്‍ പരുക്കേറ്റ കുട്ടികള്‍ ഉള്‍പ്പെടെയുള്ള പഠനയാത്രാ സംഘം മറ്റൊരു വാഹനത്തില്‍ രാവിലെ തന്നെ തിരുവനന്തപുരത്തേക്ക് പോയി. അപകടമുണ്ടാക്കിയ കണ്ടെയ്‌നര്‍ ലോറി കണ്ടെത്താനുള്ള അന്വേഷണങ്ങള്‍ ആരംഭിച്ചിട്ടുണ്ട്.