ന്യൂയോര്‍ക്ക്: റോഹിംഗ്യകള്‍ക്ക് മ്യാന്‍മറില്‍ സുരക്ഷയൊരുക്കാതെ തിരിച്ചയക്കുന്ന കാര്യത്തില്‍ പുനഃപരിശോധന നടത്തണമെന്ന് യു.എന്‍ അഭയാര്‍ഥി ഏജന്‍സി ഉള്‍പ്പെടെയുള്ള മനുഷ്യാവകാശ സംഘടനകള്‍.
ആവശ്യമായി സുരക്ഷാനടപടികള്‍ സ്വീകരിക്കാതെ ബംഗ്ലാദേശില്‍നിന്ന് റോഹിംഗ്യന്‍ അഭയാര്‍ഥികളെ തിരിച്ചയക്കുന്ന നടപടികള്‍ക്കെതിരേയാണ് നിരവധി സംഘടനകള്‍ രംഗത്തെത്തിയത്. അഭയാര്‍ഥികളെ തിരിച്ചയക്കാനുള്ള ശ്രമങ്ങള്‍ ഇന്നലെ മുതലാണ് ആരംഭിച്ചത്.
റോഹിംഗ്യകളെ തിരിച്ചയക്കുന്ന പദ്ധതിയില്‍നിന്ന് ബംഗ്ലാദേശ് പിന്‍മാറണം. അഭയാര്‍ഥികളെ ബാധിക്കുന്ന നിരവധി പ്രതിസന്ധികള്‍ മ്യാന്‍മറിലുണ്ടെന്നും ഇത് പരിഹരിക്കാതെ ഇവരെ തിരിച്ചയക്കുന്നത് സുരക്ഷിതമല്ലെന്നും യു.എന്‍ അഭയാര്‍ഥി ഏജന്‍സി തലവന്‍ ഫിലിപ്പോ ഗ്രാന്‍ഡി പറഞ്ഞു.
റോഹിംഗ്യകളുടെ പൗരത്വം ഉള്‍പ്പെടെയുള്ള വിഷയങ്ങള്‍ ഇതുവരെ ചര്‍ച്ച ചെയ്തിട്ടില്ലെന്ന് ഫിലിപ്പോ ഗ്രാന്‍ഡി ചൂണ്ടിക്കാട്ടി. മടങ്ങുന്നവര്‍ക്കായി ആവശ്യമായ സൗകര്യങ്ങള്‍ മ്യാന്‍മറില്‍ ഒരുക്കണം. യു.എന്‍ അഭയാര്‍ഥി ഏജന്‍സിക്ക് ഈ ചുമതല ഏറ്റെടുക്കാന്‍ മ്യാന്‍മറിലെ സാഹചര്യം പരിഗണിച്ച് സാധ്യമല്ലെന്നും ഫിലിപ്പോ ഗ്രാന്‍ഡി കൂട്ടിച്ചേര്‍ത്തു.
കഴിഞ്ഞ ഓഗസ്റ്റ് മുതല്‍ മ്യാന്‍മറിലെ റാഖൈന്‍ പ്രദേശങ്ങളിലുണ്ടായ റോഹിംഗ്യകള്‍ക്കെതിരേയുള്ള ആക്രമണത്തില്‍ ഇതുവരെ 6,55,500 പേര്‍ ബംഗ്ലാദേശിലേക്ക് പലായനം ചെയ്തിട്ടുണ്ട്. റോഹിംഗ്യന്‍ മുസ്‌ലിംകളെ അനധികൃതമായി കുടിയേറിയ ബംഗാളികള്‍ എന്നാണ് മ്യാന്‍മര്‍ സര്‍ക്കാര്‍ വിലയിരുത്തുന്നത്. ഇതുവരെ സര്‍ക്കാര്‍ ഇവര്‍ക്ക് പൗരത്വവും നല്‍കിയിട്ടില്ല.
മ്യാന്‍മര്‍-ബംഗ്ലാദേശ് സര്‍ക്കാരുകള്‍ ഈ മാസം ആദ്യം നടത്തിയ കൂടിക്കാഴ്ചയുടെ അടിസ്ഥാനത്തില്‍ രണ്ടുവര്‍ഷത്തിനുള്ളില്‍ റോഹിംഗ്യന്‍ അഭയാര്‍ഥികളെ തിരിച്ചയക്കാന്‍ ധാരണയായിരുന്നു.
റാഖൈനിലെ രണ്ടുകേന്ദ്രങ്ങളിലായി അഭയാര്‍ഥികള്‍ക്കായുള്ള താല്‍ക്കാലിക ക്യാംപുകള്‍ ഒരുക്കിയിട്ടുണ്ടെന്ന് മ്യാന്‍മര്‍ സര്‍ക്കാര്‍ പറഞ്ഞിരുന്നു.
എന്നാല്‍ മ്യാന്‍മറില്‍ സുരക്ഷിത അന്തരീക്ഷം ഇല്ലാത്തതിനാല്‍ മടങ്ങുന്നതില്‍ ബംഗ്ലാദേശിലെ റോഹിംഗ്യന്‍ അഭയാര്‍ഥികള്‍ പ്രതിഷേധിച്ചിരുന്നു.