വാഷിങ്ടണ്‍: ഐ.എസിന്റെ 'പുതിയ ജിഹാദി ജോണ്‍' എന്ന പേരിലറിയപ്പെടുന്ന ഇന്ത്യന്‍ വംശജനായ ബ്രിട്ടിഷ് പൗരന്‍ സിദ്ധാര്‍ഥ് ധറിനെ ആഗോള ഭീകര പട്ടികയില്‍ ഉള്‍പ്പെടുത്തി. ബെല്‍ജിയന്‍-മൊറോക്കന്‍ പൗരനൊപ്പമാണ് സിദ്ധാര്‍ഥിനെ ഭീകര പട്ടികയില്‍ ഉള്‍പ്പെടുത്തിയതായി യു.എസ് സ്റ്റേറ്റ് ഡിപ്പാര്‍ട്ട്‌മെന്റ് അറിയിച്ചത്. അബൂറുമൈസ എന്ന പേരിലറിയപ്പെടുന്ന ഇദ്ദേഹം ഹിന്ദു മതത്തില്‍നിന്ന് ഇസ്‌ലാമിലേക്ക് പരിവര്‍ത്തനം ചെയ്തതാണ്. ഐ.എസ് വിഡിയോകളില്‍ തടവുകാരെ കൊലപ്പെടുത്തിയിരുന്നത് ജിഹാദി ജോണ്‍ എന്നറിയപ്പെട്ടിരുന്ന മുഹമ്മദ് എംവാസിയാണ്. കഴിഞ്ഞ നവംബറില്‍ വടക്കന്‍ സിറിയയിലെ റാഖയില്‍ യു.എസ് നടത്തിയ വ്യോമാക്രമണത്തില്‍ ഇയാള്‍ കൊല്ലപ്പെട്ടിരുന്നു. പിന്നീടാണ് സിദ്ധാര്‍ഥ് പുതിയ ജിഹാദി ജോണ്‍ എന്നറിയപ്പെട്ടു തുടങ്ങിയത്.