തിരുവനന്തപുരം: അതിരപ്പിള്ളി ജലവൈദ്യുത പദ്ധതിയും ചീമേനി താപവൈദ്യുത നിലയവും മുന്നോട്ടു കൊണ്ടുപോകേണ്ടതുണ്ടെന്ന് വൈദ്യുതി മന്ത്രി കടകംപള്ളി സുരേന്ദ്രന്‍. കേരളത്തിന്റെ വികസനത്തിനു രണ്ടു പദ്ധതികളും അനിവാര്യമാണെന്നും അദ്ദേഹം മാധ്യമപ്രവര്‍ത്തകരോട് പറഞ്ഞു. അതിരപ്പിള്ളി പദ്ധതി നടപ്പാക്കുമ്പോള്‍ ഉണ്ടാകുന്ന പാരിസ്ഥിതിക പ്രശ്‌നങ്ങള്‍ സംബന്ധിച്ച് വിദഗ്ധരുമായി ചര്‍ച്ച നടത്തും. പരിസ്ഥിതിക്ക് കോട്ടംതട്ടാതെ എങ്ങന്നെ പദ്ധതി നടപ്പില്‍ വരുത്താം എന്നതുസംബന്ധിച്ച് പഠനം നടത്തും. പരിസ്ഥിതിക്ക് അനുയോജ്യമായ രീതിയില്‍ പദ്ധതി നടപ്പിലാക്കാനാണ് സര്‍ക്കാര്‍ ശ്രമിക്കുന്നത്. ഇതുസംബന്ധിച്ച് എല്ലാവരുമായും ചര്‍ച്ച  നടത്തുന്നതിന് സര്‍ക്കാര്‍ സന്നദ്ധമാണ്. ചീമേനി താപവൈദ്യുത നിലയം പ്രവര്‍ത്തന സജ്ജമാക്കുന്നത് കേരളത്തിനു ഗുണം ചെയ്യുന്ന കാര്യമാണ്. ജനങ്ങളുടെ ആശങ്ക പരിഹരിച്ച് പദ്ധതി മുന്നോട്ടു കൊണ്ടുപോകാനാണ് സര്‍ക്കാര്‍ തീരുമാനം. ചീമേനിയില്‍ തദ്ദേശവാസികള്‍ക്ക് ഗുണം ലഭിക്കുന്ന വിധത്തില്‍ ടൗണ്‍ഷിപ്പ് നിര്‍മിക്കുമെന്നും അദ്ദേഹം പറഞ്ഞു.