തൃക്കരിപ്പൂര്‍: നിയന്ത്രണം വിട്ട മണല്‍ ലോറി വീടിന്റെ മതില്‍ തകര്‍ത്തു. ഇന്നലെ പുലര്‍ച്ചെ എടച്ചാക്കൈയിലാണ് സംഭവം. മണലുമായി ചീറിപാഞ്ഞുവന്ന ലോരി എടച്ചാക്കൈയിലെ ടി.കെ അബ്ദുല്‍ ഖാദറിന്റെ ഉടമസ്ഥതയിലുള്ള വീടിന്റെ മതില്‍ ഇടിച്ചു തകര്‍ക്കുകയായിരുന്നു. അപകടത്തില്‍ ലോറിയിലുണ്ടായിരുന്ന ശരീഫ് (47), ധനേഷ് (34), വിനോദ് (44) എന്നിവര്‍ക്കു പരുക്കേറ്റു. ഇവരെ പയ്യന്നൂരിലെ സ്വകാര്യാശുപത്രിയില്‍ പ്രവേശിപ്പിച്ചു. അപകടം നടന്ന ഉടന്‍ സംഭവം നടന്ന വീടിന്റെ മതില്‍കെട്ടിനകത്തേക്കു മണല്‍ ജെ.സി.ബി ഉപയോഗിച്ച് മാറ്റുകയും ചെയ്തു.
വിവരം അറിയിച്ചെങ്കിലും പൊലിസ് എത്താന്‍ വൈകിയതായി നാട്ടുകാര്‍ ആരോപിച്ചു.
പുലര്‍ച്ചെ മണല്‍ ലോറികള്‍ ചീറിപായുന്നത് പ്രഭാത സവാരിക്കാര്‍ക്കും പാല്‍, പത്ര വിതരണക്കാര്‍ക്കും  മദ്‌റസയില്‍ പോകുന്ന കുട്ടികള്‍ക്കും ഭീഷണിയാണ്. മണല്‍ കടത്ത് പിടികൂടാന്‍ രാത്രികാല പട്രോളിങ് ഉണ്ടെങ്കിലും അവരുമായി ഒത്തുകളിച്ചാണ് മണല്‍ മാഫിയകള്‍ ഇരുട്ടിന്റെ മറവില്‍ മണല്‍ കടത്തുന്നതെന്ന ആരോപണവും ഉയര്‍ന്നിട്ടുണ്ട്. മണലുമായി ചീറിപായുന്ന ലോറി മറ്റു വാഹനങ്ങളെയോ യാത്രക്കാരെയോ തട്ടിയാല്‍ നിര്‍ത്താതെ പോവുകയാണു പതിവ്. ഗ്രാമീണ റോഡുകളില്‍ വീതി കുറഞ്ഞതിനാല്‍ ലോറികള്‍ അമിത വേഗതയില്‍ പായുന്നതു നിയന്ത്രിക്കണമെന്നാണു നാട്ടുകാരുടെ ആവശ്യം.