കരുനാഗപ്പള്ളി: സാഹിത്യകാരനായിരുന്ന എ.പി കളയ്ക്കാടിന്റെ സ്മരണാര്‍ഥം ഒരു ഗ്രന്ഥശാല ഒരുങ്ങുന്നു. എ.പി.കളയ്ക്കാട്  അന്ത്യവിശ്രമം കൊള്ളുന്ന കുലശേഖരപുരം ആദിനാട് സംഘപ്പുര ജങ്ഷന് സമീപം കോടിയാട്ട് വീടിന് മുന്നില്‍ തടിച്ചുകൂടിയ സദസ്സിന് മുന്നിലാണ് ഗ്രന്ഥശാലയുടെ പ്രഖ്യാപനം നടന്നത്. അദ്ദേഹത്തിന്റെ  ഇരുപത്തിനാലാം ചരമവാര്‍ഷികത്തിന്റെ ഭാഗമായി ബന്ധുക്കളും സാംസ്‌കാരിക പ്രവര്‍ത്തകരും മറ്റും ഒത്തുകൂടിയ ചടങ്ങില്‍  ചുനക്കര ജനാര്‍ദ്ദനന്‍നായര്‍ അനുസ്മരണ പ്രഭാഷണം നടത്തി. എ. കെ രാധാകൃഷ്ണപിള്ള അധ്യക്ഷനായി. ഗ്രന്ഥശാലയ്ക്കുള്ള പുസ്തകങ്ങള്‍ ചുനക്കര ജനാര്‍ദ്ദനന്‍നായരില്‍ നിന്നും കളയ്ക്കാടിന്റെ സഹോദരിയും മുന്‍ പഞ്ചായത്ത് പ്രസിഡന്റുമായിരുന്ന ജഗദമ്മ ഗോവിന്ദക്കുറുപ്പ് ഏറ്റുവാങ്ങി. താലൂക്ക് ലൈബ്രറി കൗണ്‍സില്‍ സെക്രട്ടറി വി.വിജയകുമാര്‍, കേരള മുസ്ലിം ജമാഅത്ത് ഫെഡറേഷന്‍ സംസ്ഥാന ജനറല്‍ സെക്രട്ടറി അഡ്വ.കെ.പി മുഹമ്മദ്, സി രാധാമണി, പഞ്ചായത്ത് പ്രസിഡന്റ് ശ്രീലേഖാ കൃഷ്ണകുമാര്‍, ആര്‍.കെ ദീപ, ആര്‍ സോമന്‍ പിള്ള, ബി കൃഷ്ണകുമാര്‍, വി.പി.എസ് മേനോന്‍ തുടങ്ങിയവര്‍ സംസാരിച്ചു.