കുന്ദമംഗലം: സര്‍വിസിനിടെ ബസില്‍ നിന്ന് തീയും പുകയും ഉയര്‍ന്നത് യാത്രക്കാരെയും നാട്ടുകാരെയും പരിഭ്രാന്തിയിലാക്കി. ഇന്നലെ വൈകിട്ട് 5.30ഓടെ കുന്ദമംഗലം ബസ് സ്റ്റാന്‍ഡിലാണ് സംഭവം. കോഴിക്കോട്ട് നിന്ന് നരിക്കുനിയിലേക്ക് സര്‍വിസ് നടത്തുന്ന സ്വകാര്യ ബസ് സ്റ്റാന്‍ഡിലേക്ക് കയറിയ ഉടനെയായിരുന്നു പുക ഉയര്‍ന്നത്. ബസ് നിര്‍ത്തിയ സമയമായതിനാല്‍ യാത്രക്കാര്‍ പെട്ടെന്ന് ഇറങ്ങുകയായിരുന്നു. ഉടന്‍ തീ പടരുന്നത് ശ്രദ്ധയില്‍പ്പെട്ട ബസ് ജീവനക്കാരും മറ്റു ബസുകളിലെ ജീവനക്കാരും ചേര്‍ന്ന് വെള്ളമൊഴിച്ചതിനാല്‍ തീ ആളിപ്പടര്‍ന്നില്ല. വെള്ളിമാട്കുന്നില്‍ നിന്ന് രണ്ട് യൂനിറ്റ് ഫയര്‍ഫോഴ്‌സ് സംഭവസ്ഥലത്തെത്തിയിരുന്നു.