കാബൂള്‍: അഫ്ഗാന്‍ തലസ്ഥാനമായ കാബൂളില്‍ ചാവേറാക്രമണത്തില്‍ 103 പേര്‍ കൊല്ലപ്പെട്ടു. 151 പേര്‍ക്ക് പരുക്കേല്‍ക്കുകയും ചെയ്തു. ആക്രമണത്തിന്റെ ഉത്തരവാദിത്തം താലിബാന്‍ ഏറ്റെടുത്തു.

അഫ്ഗാനിസ്ഥാന്‍ ആഭ്യന്തര മന്ത്രാലയ കെട്ടിടത്തിന്റെ തൊട്ടടുത്താണ് ഉഗ്ര സ്‌ഫോടനമുണ്ടായത്. ആംബുലന്‍സില്‍ ബോംബുകള്‍ ഒളിപ്പിച്ചാണ് ആക്രമണം നടത്തിയത്. മന്ത്രാലയത്തിലേക്കുള്ള പ്രവേശന കവാടത്തിനു തൊട്ടടുത്താണ് ആംബുലന്‍സ് നിര്‍ത്തിയിട്ടിരുന്നത്. വളരെ തിരക്കേറിയ മേഖലയായതിനാല്‍ വലിയ ആഘാതമുണ്ടായി.

ആഭ്യന്തര മന്ത്രാലയ കെട്ടിടം കൂടാതെ, സര്‍ക്കാര്‍ ഓഫിസുകള്‍, സ്‌കൂള്‍, കച്ചവട സ്ഥാപനങ്ങള്‍, ആശുപത്രി എന്നിവ സ്ഥിതി ചെയ്യുന്ന സ്ഥലത്താണ് സ്‌ഫോടനമുണ്ടായത്.