മലപ്പുറം: മദ്യപിച്ചു വാഹനമോടിച്ച് അപകടംവരുത്തിയ എസ്.ഐക്കും പൊലിസുകാരനും സസ്‌പെന്‍ഷന്‍. എടവണ്ണ പൊലിസ് സ്‌റ്റേഷനിലെ ഗ്രേഡ് എസ്.ഐ ഉണ്ണികൃഷണന്‍, സി.പി.ഒ വേണുഗോപാലന്‍ എന്നിവരാണ് സസ്‌പെന്‍ഷനിലായത്.
ഡ്യൂട്ടിക്കിടെ മദ്യപിച്ച് കാറോടിച്ച് കോഴിക്കോട് പന്നിയങ്കര കുറ്റിയില്‍വച്ച് ഓട്ടോയിലിടിച്ച് അപകടമുണ്ടായിരുന്നു. സംഭവത്തില്‍ ഓട്ടോ യാത്രക്കാര്‍ക്കു പരുക്കേറ്റിരുന്നു. കഴിഞ്ഞ പത്തിനാണ് സംഭവം. കോഴിക്കോട് സിറ്റി പൊലിസ് സ്റ്റേഷനില്‍ ചാര്‍ജ് ചെയ്ത കേസിനെ തുടര്‍ന്നാണ് മലപ്പുറം എസ്.പി ദേബേഷ് കുമാര്‍ ബെഹ്‌റ ഇരുവരെയും സസ്‌പെന്‍ഡ് ചെയ്തത്. വേണുഗോപാലാണ് കാര്‍ ഓടിച്ചിരുന്നതെന്നു പൊലിസ് പറഞ്ഞു.