മുംബൈ: കേന്ദ്രസര്‍ക്കാരിനെതിരേ വീണ്ടും രൂക്ഷ വിമര്‍ശനവുമായി ശിവസേന അധ്യക്ഷന്‍ ഉദ്ധവ് താക്കറെ. മോദി സര്‍ക്കാരിന്റെ ഭരണം ഒന്നുമല്ലെന്നും കോണ്‍ഗ്രസ് വിരുദ്ധ തരംഗം കൊണ്ട് മാത്രമാണ് ബി.ജെ.പി അധികാരത്തിലെത്തിയതെന്നും ഉദ്ധവ് പറഞ്ഞു. മഹാരാഷ്ട്രയിലെ ബി.എം.സി തെരഞ്ഞെടുപ്പിന്റെ പ്രചാരണ റാലിയില്‍ സംസാരിക്കവെയാണ് ഉദ്ധവ് മോദിയെയും കേന്ദ്ര സര്‍ക്കാരിനെയും കടന്നാക്രമിച്ചത്.
 സോപ്പില്ലാതെ പതയുണ്ടാക്കുകയാണ് മോദി ചെയ്തതെന്ന് മന്‍മോഹന്‍സിങിനെതിരായ മഴക്കോട്ട് പരാമര്‍ശത്തെ സൂചിപ്പിച്ച് ഉദ്ധവ് വ്യക്തമാക്കി. മന്‍മോഹന്‍ മഴക്കോട്ട് ധരിച്ചിട്ടുണ്ട്. അതിനര്‍ഥം അദ്ദേഹം കുറഞ്ഞത് വെള്ളം ഉപയോഗിച്ചെങ്കിലും കുളിക്കുന്നുണ്ട് എന്നാണ്. പക്ഷേ മോദി സ്വയം കുളിക്കാതിരിക്കുകയും രാജ്യത്തെ ജനങ്ങളുടെ കുളിക്കാനുള്ള വെള്ളം ഇല്ലാതാക്കുകയുമാണെന്ന് നോട്ടുനിരോധനത്തെ പരാമര്‍ശിച്ച് ഉദ്ധവ് പരിഹസിച്ചു. എന്നാല്‍ തദേശതെരഞ്ഞെടുപ്പില്‍ ബി.ജെ.പിയോടൊപ്പമല്ല മത്സരിക്കുന്നതെന്നും തന്റെ ചിത്രം അവരുടെ പോസ്റ്ററില്‍ വന്നത് അനുവാദം ചോദിക്കാതെയാണെന്നും ഉദ്ധവ് കൂട്ടിച്ചേര്‍ത്തു.