മാഡ്രിഡ്: സ്പാനിഷ് ലാ ലിഗയില്‍ റയല്‍ മാഡ്രിഡ് കുതിപ്പ് തുടരുന്നു. ഒസാസുനയെ ഒന്നിനെതിരേ മൂന്നു ഗോളുകള്‍ക്ക് കീഴടക്കി അവര്‍ പോയിന്റ് പട്ടികയില്‍ ഒന്നാം സ്ഥാനം നിലനിര്‍ത്തി. ക്രിസ്റ്റ്യാനോ റൊണാള്‍ഡോ, ഇസ്‌ക്കോ, ലുക്കാസ് വാസ്‌ക്വസ് എന്നിവരുടെ ഗോളുകളാണു റയലിനു വിജയമൊരുക്കിയത്. ജയത്തോടെ റയലിനു 49 പോയിന്റുകള്‍. ബാഴ്‌സലോണ 48 പോയിന്റുമായി രണ്ടാമതുണ്ട്. അതേസമയം ബാഴ്‌സയേക്കാള്‍ രണ്ടു മത്സരം കുറച്ചു കളിച്ചാണ് റയല്‍ ഒന്നാം സ്ഥാനത്ത് തുടരുന്നത്. സെവിയ്യ മൂന്നാമത്. മറ്റു മത്സരങ്ങളില്‍ വിയ്യാറല്‍- മലാഗ പോരാട്ടം 1-1നു സമനില. സ്‌പോര്‍ടിങ് ഗിജോണ്‍ 2-0ത്തിനു ലെഗാനസിനെ വീഴ്ത്തി.

സമനിലയിലും
ചെല്‍സിക്ക് കുലുക്കമില്ല
ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ഒന്നാം സ്ഥാനത്ത് കുതിക്കുന്ന ചെല്‍സിയെ ബേണ്‍ലി സമനിലയില്‍ കുരുക്കി. കളിയുടെ ഏഴാം മിനുട്ടില്‍ പെഡ്രോയിലൂടെ ചെല്‍സി മുന്നിലെത്തിയെങ്കിലും 24ാം മിനുട്ടില്‍ ബ്രാഡിയുടെ ഗോളിലാണ് അവര്‍ നീലപ്പടയെ സമനിലയില്‍ കരുക്കിയത്. സമനിലയായെങ്കിലും പോയിന്റ് പട്ടികയില്‍ പത്തു പോയിന്റെ കൃത്യമായ വ്യത്യാസത്തില്‍ 60 പോയിന്റുമായി ചെല്‍സി തന്നെ ഒന്നാം സ്ഥാനത്ത്. രണ്ടാമതുള്ള ടോട്ടനത്തിനും മൂന്നാം സ്ഥാനത്തുള്ള ആഴ്‌സണലിനും 50 പോയിന്റുകള്‍.

റോമയ്ക്കും
ഇന്ററിനും ജയം

മിലാന്‍: ഇറ്റാലിയന്‍ സീരി എയില്‍ റോമ, ഇന്റര്‍ മിലാന്‍ ടീമുകള്‍ക്ക് വിജയം. റോമ ക്രോടോണിനേയും ഇന്റര്‍ മിലാന്‍ എംപോളിയേയും 2-0ത്തിനു പരാജയപ്പെടുത്തി. ജയത്തോടെ 53 പോയിന്റുമായി റോമ രണ്ടാമതും 45 പോയിന്റുമായി ഇന്റര്‍ മിലാന്‍ നാലാം സ്ഥാനത്തും. മറ്റു മത്സരങ്ങളില്‍ ഫിയോരെന്റിന 3-0ത്തിനു ഉദീനിസയേയും അറ്റ്‌ലാന്‍ഡ പാലെര്‍മോയേയും ചീവോ സസോളോയേയും 3-1നു വീഴ്ത്തി. ടൊറിനോ 5-3നു പെസ്‌ക്കാരയെ പരാജയപ്പെടുത്തി.

ഹോഫെന്‍ഹെയിമിന് രണ്ടാം തോല്‍വി

മ്യൂണിക്ക്: ജര്‍മന്‍ ബുണ്ടസ് ലീഗയില്‍ വോള്‍വ്‌സ്ബര്‍ഗിനു വിജയം. ഒന്നിനെതിരേ രണ്ടു ഗോളുകള്‍ക്ക്  അവര്‍ ഹോഫെന്‍ഹെയിമിനെ വീഴ്ത്തി. സീസണിലെ രണ്ടാം തോല്‍വിയാണ് ഹോഫെന്‍ഹെയിം നേരിടുന്നത്.