തൃശൂര്‍: യുവനടി സനുഷയെ ട്രെയിനില്‍വച്ച് അപമാനിക്കാന്‍ ശ്രമിച്ച കേസില്‍ തമിഴ്‌നാട് സ്വദേശി അറസ്റ്റില്‍. കന്യാകുമാരി സ്വദേശി ആന്റോ ബോസാണ് അറസ്റ്റിലായത്. ബുധനാഴ്ച രാത്രി ഒരുമണിയോടെ മംഗലാപുരം- തിരുവനന്തപുരം മാവേലി എക്‌സ്പ്രസ് വടക്കാഞ്ചേരി സ്റ്റേഷനില്‍ എത്തിയതോടെയാണ് സംഭവം. ട്രെയിനില്‍ എ വണ്‍ കോച്ചില്‍ ഉറങ്ങുകയായിരുന്ന സനുഷയെ അടുത്ത ബര്‍ത്തിലുണ്ടായിരുന്ന ആന്റോ ബോസ് കടന്നുപിടിക്കുകയായിരുന്നു. സനുഷ ഇയാളുടെ കൈ പിടിച്ചുവച്ച് ബഹളംവച്ചെങ്കിലും സഹയാത്രികര്‍ ആരും തിരിഞ്ഞുനോക്കിയില്ലെന്ന് പറയുന്നു. തുടര്‍ന്ന് ട്രെയിനിലുണ്ടായിരുന്ന തിരക്കഥാകൃത്ത് ആര്‍. ഉണ്ണിയും എറണാകുളത്തേക്ക് പോകുകയായിരുന്ന ഒരു യാത്രക്കാരനുമാണ് സഹായത്തിനെത്തിയത്. റെയില്‍വേ പൊലിസില്‍ വിവരമറിയിച്ചതിനെത്തുടര്‍ന്ന് തൃശൂര്‍ റെയില്‍വേ പൊലിസെത്തി അറസ്റ്റ് ചെയ്യുകയായിരുന്നു. നടിയുടെ പരാതിയില്‍ പ്രതിക്കെതിരേ മാനഭംഗശ്രമത്തിന് കേസെടുത്തു. സനുഷ തിരുവനന്തപുരത്തേക്ക് പോകുകയായിരുന്നു. തിരൂരില്‍ നിന്നാണ് ആന്റോ ബോസ് ട്രെയിനില്‍ കയറിയത്.അപമാനിക്കാന്‍ ശ്രമിച്ചയാള്‍ക്കെതിരേ പ്രതികരിക്കാന്‍ തയാറായ സനുഷയുടെ നടപടി മാതൃകാപരമെന്ന് സംസ്ഥാന പൊലിസ് മേധാവി ലോക്‌നാഥ് ബെഹ്‌റ പറഞ്ഞു.