ചേളാരി : 2018 ജനുവരി മുതല്‍ മെയ് വരെ ആചരിക്കുന്ന സമസ്ത ആദര്‍ശ കാംപയിനിന്റെ ഭാഗമായി ആലപ്പുഴ, മലപ്പുറം, കണ്ണൂര്‍, കാസര്‍കോട്,എന്നീ നാല് കേന്ദ്രങ്ങളില്‍ വച്ച് നടക്കുന്ന മേഖലാ പ്രവര്‍ത്തക സംഗമങ്ങളുടെ സ്വാഗതസംഘം യോഗം ഇന്ന് മുതല്‍ ആരംഭിക്കുന്നു. കന്യാകുമാരി, തിരുവനന്തപുരം,കൊല്ലം, പത്തനംതിട്ട, ഇടുക്കി, ആലപ്പുഴ, കോട്ടയം, എറണാകുളം ജില്ലകള്‍ ഉള്‍പ്പെട്ട ദക്ഷിണ മേഖലാ സംഗമത്തിന്റെ സ്വാഗത സംഘം രൂപീകരണ യോഗം ഇന്ന് വൈകിട്ട് മൂന്നിന് ആലപ്പുഴ റൈബാന്‍ ഓഡിറ്റോറിയത്തില്‍ വച്ചും മലപ്പുറം, തൃശൂര്‍, പാലക്കാട്, നീലഗിരി ജില്ലകള്‍ ഉള്‍പ്പെട്ട മധ്യമേഖലാ സംഗമത്തിന്റെ സ്വാഗത സംഘം രൂപീകരണ യോഗം ഇന്ന് വൈകിട്ട് മൂന്നിന് മലപ്പുറം സുന്നിമഹലില്‍ വച്ചും ചേരും.
കോഴിക്കോട്, വയനാട്, കുടക്, കണ്ണൂര്‍ ജില്ലകള്‍ ഉള്‍പ്പെട്ട ഉത്തര മേഖലാ സംഗമത്തിന്റെ സ്വാഗതസംഘം യോഗം 11ന് രാവിലെ 11 മണിക്ക് കണ്ണൂര്‍ ഇസ്‌ലാമിക് സെന്ററില്‍ നടക്കും. കാസര്‍കോട്, കര്‍ണാടക ഉള്‍പ്പെട്ട ഇന്റര്‍ സോണ്‍ മേഖലാ സംഗമത്തിന്റെ സ്വാഗതസംഘം യോഗം ഏഴിന് രാവിലെ 10.30ന് ഖുവ്വത്തുല്‍ ഇസ്‌ലാം മദ്‌റസ ചെര്‍ക്കളയില്‍ വച്ചും ചേരും.
യോഗത്തില്‍ സമസ്ത കേരള ജംഇയ്യത്തുല്‍ ഉലമായുടെയും പോഷക സംഘടനകളുടെയും സംസ്ഥാന നേതാക്കള്‍ പങ്കെടുക്കും. സ്വാഗത സംഘം യോഗങ്ങളില്‍ ജില്ലകളിലെ ബന്ധപ്പെട്ടവര്‍ സംബന്ധിക്കുമെന്ന് സമസ്ത ഏകോപന സമിതി ചെയര്‍മാന്‍ സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളും കണ്‍വീനര്‍ എം.ടി അബ്ദുല്ല മുസ്‌ലിയാരും അറിയിച്ചു.