സെഞ്ചൂറിയന്‍: ഡിവില്ല്യേഴ്‌സിന് പിന്നാലെ ക്യാപ്റ്റന്‍ ഫാഫ് ഡുപ്ലെസിസും പരുക്കേറ്റ് പുറത്തായതിന്റെ ഞെട്ടലില്‍ ദക്ഷിണാഫിക്ക ഇന്ന് ഇന്ത്യക്കെതിരായ രണ്ടാം ഏകദിന പോരിനായി ഇറങ്ങും. മൂന്നാം മത്സരം മാത്രം കളിക്കാനൊരുങ്ങുന്ന 23കാരനായ എയ്ഡന്‍ മാര്‍ക്രം ദക്ഷിണാഫ്രിക്കയെ നയിക്കും. ആദ്യ ഏകദിനത്തില്‍ ഇന്ത്യയോട് തോല്‍ക്കേണ്ടി വന്നതിന്റെ ക്ഷീണം തീര്‍ത്ത് പരമ്പരയില്‍ ഒപ്പമെത്താനുള്ള ലക്ഷ്യവുമായാണ് ദക്ഷിണാഫ്രിക്ക രണ്ടാം ഏകദിനത്തിനായി ഇറങ്ങുന്നത്. ഡുപ്ലെസിസ് ഇല്ലാത്തതിനാല്‍ ആതിഥേയര്‍ ബാറ്റിങ് നിരയില്‍ പുതുമുഖം ഖയ സോണ്ടോ അല്ലെങ്കില്‍ ബഹാര്‍ദീന്‍ എന്നിവരില്‍ ഒരാള്‍ക്ക് അവസരം നല്‍കിയേക്കും.
ടെസ്റ്റ് പരമ്പര അടിയറവ് വച്ചതിന്റെ ക്ഷീണം ഏകദിനത്തില്‍ തീര്‍ക്കാനുള്ള ഒരുക്കവുമായി ആദ്യ ഏകദിനത്തനിറങ്ങിയ ഇന്ത്യ വിജയത്തുടക്കമിട്ടിരുന്നു. വിജയിച്ചതിന്റെ ആത്മവിശ്വാസം കരുത്താക്കിയാണ് കോഹ്‌ലിയും സംഘവും ഇന്നിറങ്ങുന്നത്. കുല്‍ദീപ് യാദവ്, യുസ്‌വേന്ദ്ര ചഹല്‍ ദ്വയത്തിന്റെ സ്പിന്‍ ബൗളിങ് നേരിടാനാകാതെ കുഴങ്ങിയ ദക്ഷിണാഫ്രിക്കയെ അതേ തന്ത്രത്തില്‍ തന്നെ വരുതിയിലാക്കുകയാണ് രണ്ടാം പോരിലും ഇന്ത്യ നോട്ടമിടുന്നത്. ആദ്യ ഏകദിനം കളിച്ച ടീമില്‍ ഭുവനേശ്വര്‍ കുമാറിന് പകരം ഇന്ന് ശാര്‍ദുല്‍ താക്കൂറിന് അവസരം നല്‍കിയേക്കും. മറ്റ് മാറ്റങ്ങള്‍ ഉണ്ടാകില്ല. നാലാം നമ്പറില്‍ രഹാനെ ക്ലിക്കായതും ഇന്ത്യക്ക് ബോണസാണ്.