റിയാദ്: ലോകത്തെ ഏറ്റവും ഉയര്‍ന്ന മൂല്യമുള്ള കുതിരപ്പന്തയത്തിന് റിയാദ് സാക്ഷിയാകും. റിയാദ് കിങ് അബ്ദുല്‍ അസീസ് കുതിരപ്പന്തയ മത്സരത്തിലെ വിജയിയെ കാത്തിരിക്കുന്നത് 1.7 കോടി ഡോളറാണ്. ഒരുപക്ഷെ, കായിക ചരിത്രത്തില്‍തന്നെ ഒരു ഇനത്തിന് ഏറ്റവും കൂടുതല്‍ ലഭിക്കുന്ന ഉയര്‍ന്ന സമ്മാനത്തുകയുമായിരിക്കുമിത്. കുതിരപ്പന്തയത്തില്‍ നിലവിലെ ചരിത്രവേദികളായ കെന്റക്കിലെയും ദുബൈയിലെയും മത്സരങ്ങളെ വെല്ലുന്ന പരിപാടിക്കായിരിക്കും റിയാദ് സാക്ഷ്യം വഹിക്കുക.
കുതിരപ്പന്തയത്തില്‍ അമേരിക്ക, ബ്രിട്ടന്‍, ജപ്പാന്‍ എന്നിവിടങ്ങളില്‍നിന്നടക്കം മത്സരാര്‍ഥികള്‍ എത്തുന്നുണ്ട്. സഊദിയുടെ ചരിത്ര, സാംസ്‌കാരിക പാരമ്പര്യത്തിന്റെ പ്രതീകമായാണു കുതിരപ്പന്തയങ്ങള്‍ നടന്നുവരുന്നതെന്ന് ജനറല്‍ സ്‌പോര്‍ട്‌സ് അതോറിറ്റി പറഞ്ഞു.