കോഴിക്കോട്: പാട്ടുകൂട്ടം കോഴിക്കോട് ഏര്‍പ്പെടുത്തിയ പ്രഥമ കലാഭവന്‍ മണി പുരസ്‌കാരങ്ങള്‍ പ്രഖ്യാപിച്ചു. സജീവന്‍ കൊയിലാണ്ടി, കൃഷ്ണദാസ് വല്ലാപ്പുനി, കുഞ്ഞന്‍ ചേളനൂര്‍, രമേഷ് വെണ്‍മയത്ത്, ബിനീഷ് മണിയൂര്‍, യു.ടി ശ്രീധരന്‍ എന്നിവരാണ് അവാര്‍ഡിന് അര്‍ഹരായത്. 10001 രൂപയും പ്രശസ്തി പത്രവും, ഫലകവും അടങ്ങുന്നതാണ് അവാര്‍ഡ്. മാര്‍ച്ച് ആറിന് വൈകുന്നേരം നാലിന് മാനാഞ്ചിറ സ്‌ക്വയര്‍ ഓപ്പണ്‍ സ്റ്റേജില്‍ നടക്കുന്ന ചടങ്ങില്‍പുരസ്‌കാരങ്ങള്‍ വിതരണം ചെയ്യുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. നാടന്‍ കലാരംഗത്ത് മികവ് തെളിയിച്ച ജില്ലയിലെ ആറ് പ്രതിഭകള്‍ക്കാണ് പുരസ്‌കാരം. പാട്ടുകൂട്ടം ഡയറക്ടര്‍ ഗിരീഷ് ആനപ്ര, വില്‍സണ്‍ സാമുവല്‍, ജഗ്തമയന്‍ ചന്ദ്രപുരി, ബാബുരാജ് കീഴരിയൂര്‍ വാര്‍ത്താസമ്മേളനത്തില്‍ പങ്കെടുത്തു.