ലണ്ടന്‍: നൂറ്റാണ്ടു പിന്നിട്ട ഒരു ചരിത്രത്തെ ഒടുവില്‍ ലിങ്കന്‍ സിറ്റിയെന്ന കുഞ്ഞന്‍ ക്ലബ് വഴിമാറ്റി. എഫ്.എ കപ്പിന്റെ ക്വാര്‍ട്ടറിലെത്തുന്ന ഇംഗ്ലീഷ് പ്രീമിയര്‍ ലീഗില്‍ കളിക്കാത്ത ആദ്യ ടീമായി അവര്‍ മാറി. 1914ല്‍ ക്വീന്‍സ് പാര്‍ക് റെയ്‌ഞ്ചേഴ്‌സാണ് അവസാനമായി ഇത്തരമൊരു നേട്ടം സ്വന്തമാക്കിയത്.
ഇംഗ്ലീഷ് പ്രീമിയര്‍ ലീഗ് ടീം ബേണ്‍ലിയെ അവസാന നിമിഷം നേടിയ ഒറ്റ ഗോളില്‍ അട്ടിമറിച്ചാണു ലിങ്കന്‍ സിറ്റിയുടെ 103 വര്‍ഷത്തെ റെക്കോര്‍ഡ് തകര്‍ത്തുള്ള ചരിത്ര നേട്ടം.
കളിയുടെ അവസാനം വരെ ഇരു ടീമുകളും ഗോള്‍ നേടാതെ പോയപ്പോള്‍ 89ാം മിനുട്ടില്‍ സീന്‍ റഗ്ഗറ്റെയാണു ലിങ്കന്‍ ടീമിനു അവിസ്മരണീയ വിജയം സമ്മാനിച്ചത്. നേരത്തെ എഫ്.എ കപ്പിന്റെ പ്രീ ക്വാര്‍ട്ടറിലെത്തിയതായിരുന്നു ടീമിന്റെ ഇതുവരെയുള്ള നേട്ടം. ഇംഗ്ലണ്ടിലെ അഞ്ചാം ഡിവിഷന്‍ പോരാട്ടമായ നാഷണല്‍ ലീഗില്‍ മുന്‍നിരയിലുള്ള ടീമാണു ലിങ്കന്‍ സിറ്റി എഫ്.സി.