പുതിയ രാഷ്ട്രീയ പാര്‍ട്ടി രൂപീകരിക്കുമെന്ന് പ്രഖ്യാപിച്ച് പിവി അന്‍വര്‍ എം.എല്‍.എ. ജനങ്ങള്‍ കൂടെയുണ്ടാകുമെന്നും വരുന്ന തദ്ദേശ തെരഞ്ഞെടുപ്പില്‍ കേരളത്തില്‍ എല്ലായിടത്തും മത്സരിക്കുമെന്നും പി.വി അന്‍വര്‍ വ്യക്തമാക്കി. 

തന്റെ പാര്‍ട്ടിയില്‍ ജനങ്ങളില്‍നിന്ന് പുതിയ നേതാക്കള്‍ ഉയര്‍ന്നു വരും. പൊളിറ്റിക്കല്‍ നെക്‌സസിന്റെ ഭാഗമല്ലാത്ത നേതാകള്‍ക്കും അതിന്റെ ഭാഗമാകാം- അദ്ദേഹം വ്യക്തമാക്കി.

'21 വയസായ ആര്‍ക്കും ഇവിടെ മത്സരിക്കാമല്ലോ. നമ്മളുയര്‍ത്തുന്ന വിഷയങ്ങളെയും നയങ്ങളെയും നമ്മള്‍ പറയുന്ന ആദര്‍ശങ്ങളേയും പ്രതിനിധീകരിക്കുന്ന ഒരു വ്യക്തിയായിരിക്കും അതിന്റെ നേതാവ്. അയാള്‍ ചെറുതാകാം. വലുതാകാം. ആളുകളുടെ വലിപ്പം കാണിച്ച് അതിന് വോട്ട് വാങ്ങുകയല്ല. ഉയര്‍ത്തുന്ന ആശയങ്ങള്‍ക്കും ആദര്‍ശങ്ങള്‍ക്കും കാഴ്ചപ്പാടുകള്‍ക്കുമൊപ്പം നില്‍ക്കാവുന്ന ജനങ്ങളെയാണ് പ്രതീക്ഷിക്കുന്നത്'.

മതേതരത്വത്തില്‍ ഊന്നിയ പ്രത്യയശാസ്ത്രമായിരിക്കും പുതിയ രാഷ്ട്രീയ പാര്‍ട്ടിക്കെന്നും പി.വി അന്‍വര്‍ മാധ്യമങ്ങളോട് പറഞ്ഞു. പി.ശശിയ്ക്കും അജിത് കുമാറിനുമെതിരെ തുടങ്ങിയ പോരാട്ടമാണിതെന്നും ഉന്നയിച്ച ആരോപണങ്ങളില്‍ എവിടെയും നിര്‍ത്ത് എന്ന് മുഖ്യമന്ത്രി പറഞ്ഞിട്ടില്ലെന്നും അന്‍വര്‍ കൂട്ടിച്ചേര്‍ത്തു.

അതേസമയം ദ ഹിന്ദു ദിന പത്രത്തിന് മുഖ്യമന്ത്രി പിണറായി വിജയന്‍ നല്‍കിയ വിവാദ അഭിമുഖത്തില്‍ രൂക്ഷ വിമര്‍ശനവും പിവി അന്‍വര്‍ ഉയര്‍ത്തി. മുഖ്യമന്ത്രി പിണറായി വിജയന്‍ രാജി വെക്കണമെന്ന് ആവശ്യപ്പെട്ട അന്‍വര്‍  സ്ഥാനം ഒഴിയുന്നതാണ് അദ്ദേഹത്തിന് നല്ലതെന്നും കൂട്ടിച്ചേര്‍ത്തു.