ന്യൂഡല്‍ഹി: കഴിഞ്ഞവര്‍ഷം നടന്ന കൊല്‍ക്കൊത്ത പ്ലീനത്തിലെ തീരുമാനങ്ങള്‍ നടപ്പാക്കുന്നതിലെ പുരോഗതി വിലയിരുത്താനായി സി.പി.എം പോളിറ്റ്ബ്യൂറോ യോഗം ഇന്നു ഡല്‍ഹിയില്‍ നടക്കും.

ഉത്തര്‍പ്രദേശ് അടക്കം അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പ് ഉള്‍പ്പെടെയുള്ള രാഷ്ട്രീയ സാഹചര്യങ്ങളും യോഗം വിലയിരുത്തും.

കഴിഞ്ഞ തവണ തിരുവനന്തപുരത്ത് നടന്ന പി.ബിയില്‍ മുതിര്‍ന്ന നേതാവ് വി.എസ് അച്യുതാനന്ദനെതിരേയുള്ള കമ്മിഷന്‍ റിപ്പോര്‍ട്ട് ചര്‍ച്ച ചെയ്യുകയും നടപടി സ്വീകരിക്കുകയും ചെയ്ത സാഹചര്യത്തില്‍ വിവാദ ചര്‍ച്ചകളൊന്നും ഇന്നത്തെ യോഗത്തിലുണ്ടായേക്കില്ല. അതേസമയം ഭരണപരമായ ഇടപെടല്‍ സംബന്ധിച്ച് മുന്നണിക്കുള്ളിലെ തര്‍ക്ക വിഷയം യോഗത്തില്‍ ചര്‍ച്ചയായേക്കും.