കൊച്ചി: വിവാദമായ അതിരൂപത ഭൂമിയിടപാടുമായി ബന്ധപ്പെട്ട കാര്യങ്ങള്‍ വിശദമാക്കണമെന്നാവശ്യപ്പെട്ട് ആര്‍ച്ച് ഡൈസോണ്‍ മൂവ്‌മെന്റ് ഫോര്‍ ട്രാന്‍സ്പരന്‍സ് (എ.എം.ടി) പ്രവര്‍ത്തകര്‍ ഇന്നലെ മേജര്‍ ആര്‍ച്ച് ബിഷപ്പ് കര്‍ദിനാള്‍ മാര്‍ ജോര്‍ജ് ആലഞ്ചേരിയെ സന്ദര്‍ശിച്ചു. എന്നാല്‍ ചര്‍ച്ച നിരാശാജനകമായിരുന്നുവെന്ന് ഇവര്‍ പറഞ്ഞു.
ഭൂമിയിടപാടുമായി ബന്ധപ്പെട്ട് പുറത്തുവരുന്ന അസത്യ പ്രചരണങ്ങള്‍ വിശ്വാസികളില്‍ ദു:ഖമുണ്ടാക്കുന്നതായി ഇവര്‍ കര്‍ദിനാളിനെ അറിയിച്ചു. തങ്ങളുടെ ആവശ്യങ്ങള്‍ കര്‍ദിനാളിനെ അറിയിച്ചെങ്കിലും നിഷേധാത്മക നിലപാടാണ് അദ്ദേഹം സ്വീകരിച്ചതെന്ന് എ.എം.ടി പ്രവര്‍ത്തകര്‍ പറഞ്ഞു. പ്രധാനമായും മൂന്ന് കാര്യങ്ങളാണ് ആലഞ്ചേരിക്കുമുന്നില്‍ വച്ചത്.
അതിരൂപതയുടെ പ്രവര്‍ത്തനങ്ങളുമായി ബന്ധപ്പെട്ട് തങ്ങള്‍ നടത്തുന്ന ചര്‍ച്ചകള്‍ തടയുന്നവരെ നിയന്ത്രിക്കുക, ഭൂമിക്കച്ചവടവുമായി ബന്ധപ്പെട്ട് പിഴവുകള്‍ വെളിപ്പെടുത്തുക, ഗുരുതരമായ വീഴ്ചകള്‍ നടത്തിയ ആലഞ്ചേരി സ്ഥാനത്യാഗം ചെയ്യുക എന്നിവയായിരുന്നു ആവശ്യങ്ങള്‍. എന്നാല്‍ ഇതൊന്നും അംഗീകരിക്കാന്‍ കര്‍ദിനാള്‍ തയാറായില്ലെന്ന് എ.എം.ടി പ്രവര്‍ത്തകര്‍ പറഞ്ഞു. ചര്‍ച്ച തടയുന്നവരെ നിയന്ത്രിക്കണമെന്നാവശ്യപ്പെട്ടപ്പോള്‍ അവരെ തനിക്ക് അറിയില്ലെന്ന മറുപടിയാണ് കര്‍ദിനാള്‍ നല്‍കിയത്. തങ്ങള്‍ നല്‍കിയ നിവേദനത്തില്‍ ഒരാഴ്ച്ചക്കകം തീരുമാനമുണ്ടായില്ലെങ്കില്‍ ശക്തമായ സമരപരിപാടികളുമായി മുന്നോട്ട് പോകുമെന്നും ഇവര്‍ അറിയിച്ചു. ഇതിനായി വിശ്വാസികളുടെ യോഗങ്ങള്‍ ഉടന്‍ വിളിച്ചുചേര്‍ക്കും.
അതിരൂപത സഹായമെത്രാന്‍ സെബാസ്റ്റ്യന്‍ ഇടയന്ത്രത്തിനും എ.എം.ടി പ്രവര്‍ത്തകര്‍ നിവേദനം നല്‍കി.
ഭൂമിയിടപാടില്‍ ആരോപണവിധേയരായ ഫോ. ജോഷി പുതുവ, ഫാ. സെബാസ്റ്റ്യന്‍ വടക്കുംപാടന്‍ എന്നിവരെ സഭയുടെ പ്രവര്‍ത്തനങ്ങളില്‍നിന്ന് താല്‍ക്കാലികമായി മാറ്റിനിര്‍ത്തുക, അതിരൂപതയുടെ കീഴിലുള്ള വസ്തുവകകളുടെയും മറ്റ് ആസ്തികളുടെയും കൃത്യമായ കണക്ക് സൂക്ഷിക്കുക തുടങ്ങിയ കാര്യങ്ങളാണ് ഇവര്‍ സഹായമെത്രാന്‍ സെബാസ്റ്റ്യന്‍ ഇടയന്ത്രത്തിനുമുന്‍പില്‍ സമര്‍പ്പിച്ച നിവേദനത്തിലുള്ളത്. നിവേദനത്തിലെ കാര്യങ്ങള്‍ അനുഭാവപൂര്‍വം പരിഗണിക്കാമെന്ന് സഹായമെത്രാന്‍ ഉറപ്പ് നല്‍കിയതായി പിന്നീട് എ.എം.ടി പ്രവര്‍ത്തകര്‍ പറഞ്ഞു.