ആനക്കര: ഡോ. എം.കെ മുനീര്‍ എം.എല്‍.എ പത്മശ്രീ അക്കിത്തത്തെ സന്ദര്‍ശിച്ചു. യു.ഡി.എഫ് മേഖലാ ജാഥ പാലക്കാട് ജില്ലയിലേക്ക് പ്രവേശിക്കുന്നതിന് മുന്‍പാണ് അക്കിത്തത്തെ കാണാന്‍ ജാഥാ ക്യാപ്റ്റന്‍ കൂടിയായ മുനീര്‍ എത്തിയത്. തുടര്‍ന്ന് അക്കിത്തത്തെ പൊന്നാട അണിയിച്ച് ആദരിച്ചു. അക്കിത്തത്തെ കാണാനും സംസാരിക്കാനും കഴിഞ്ഞത് ജീവിതത്തിലെ ധന്യമായ മുഹൂര്‍ത്തമാണെന്ന് മുനീര്‍ പറഞ്ഞു.
കോഴിക്കോട് റേഡിയോ നിലയത്തില്‍ ജോലി ചെയ്യുന്ന അവസരത്തില്‍ മുനീറിന്റെ പിതാവ് സി.എച്ച് മുഹമ്മദ് കോയയുമായി ഏറെ അടുപ്പമുണ്ടായിരുന്നുവെന്ന് അക്കിത്തം പറഞ്ഞു. വി.ടി ബല്‍റാം എം.എല്‍.എ, ഷാഫി പറമ്പില്‍ എം.എല്‍.എ, മുന്‍ എം.പി വി.എസ് വിജയരാഘവന്‍, സി.വി ബാലചന്ദ്രന്‍, രാമസ്വാമി, പി.ടി അജയ്‌മോഹന്‍, വി.കെ.എം ഷാഫി, ഇ.പി രാജീവ്, അഷറഫ് കോക്കൂര്‍, ഇ. ഷെമീര്‍, പി.എം.എ കരീം, പി.ഇ.എ സലാം, സി.എം അലി എന്നിവരും മുനീറിനൊപ്പമുണ്ടായിരുന്നു.