പൊന്നാനി: ലോകമെമ്പാടുള്ള പക്ഷിനിരീക്ഷകര്‍ക്കും പരിസ്ഥിതിപ്രേമികള്‍ക്കും ഇനി ആഹ്ലാദത്തിന്റെ നാലുനാള്‍. ഇന്ന് തുടങ്ങി 19ന് അവസാനിക്കുന്ന ലോക പക്ഷിസര്‍വേയില്‍ കേരളത്തിന്റെ വിവിധഭാഗങ്ങളില്‍ നിന്ന് ആയിരക്കണക്കിനാളുകളാണ് പങ്കെടുക്കുക. ലോകത്തെമ്പാടുമായി നടക്കുന്ന പക്ഷികളുടെ വാര്‍ഷിക കണക്കെടുപ്പില്‍ 135 രാജ്യങ്ങളിലായി രണ്ടുലക്ഷത്തോളം പേരും പങ്കാളികളാകും.

ഗ്രേറ്റ് ബാക്ക് യാര്‍ഡ് ബോര്‍ഡ് എന്ന് പേരിട്ട ഈ ഉദ്യമത്തില്‍ പക്ഷികളുടെ വിവരങ്ങള്‍ ഇ ബേര്‍ഡ് എന്ന വെബ്‌സൈറ്റിലാണ് ചേര്‍ക്കുക. ഓരോ പക്ഷിനിരീക്ഷകരും സര്‍വേയില്‍ പങ്കെടുക്കുന്നവരും സൈറ്റില്‍ അക്കൗണ്ട് ഉണ്ടാക്കി ഇതില്‍ വിവരങ്ങള്‍ ചേര്‍ക്കും. പക്ഷികളുടെ ചിത്രമെടുത്ത് ടാഗ് ചെയ്യുകയുമാവാം. ഇത്തരത്തില്‍ തയാറാക്കുന്ന പട്ടികകളെ ഹോട്ട്‌സ്‌പോട്ട് എന്നാണ് വിളിക്കുക.

പക്ഷികളുടെ ഡിജിറ്റല്‍ വിവരശേഖരണം പൂര്‍ത്തിയായാല്‍ ഭൂപടത്തില്‍ ആ പ്രദേശം സെര്‍ച്ച് ചെയ്യുന്നതോടെ പക്ഷികളുടെ പേരടക്കമുള്ള വിശദവിവരങ്ങള്‍ ലഭിക്കും. ഒരു പ്രത്യേക പക്ഷി ഭൂമിയില്‍ എവിടെയൊക്കെ ഏത് സമയത്ത് കാണപ്പെടുന്നു എന്ന വിവരം ഇതിലൂടെ ആര്‍ക്കും ലഭിക്കും.

ഈ ഭൂപടത്തില്‍ നിന്നുതന്നെ ഓരോ പക്ഷികളുടെയും കേന്ദ്രങ്ങളിലേക്ക് എത്തിച്ചേരാനുള്ള വഴിയും കണ്ടുപിടിക്കാം. കണ്ടെത്തിയ പക്ഷികളെ തിരിച്ചറിയാന്‍ പക്ഷിനിരീക്ഷകരും മറ്റും സഹായവുമായി എപ്പോഴുമുണ്ടാകും.

ഓരോ വര്‍ഷവും 135 രാജ്യങ്ങളില്‍ നിന്നായി രണ്ടുലക്ഷത്തോളം ചെക്ക്‌ലിസ്റ്റുകളാണ് ഇത്തരത്തില്‍ തയാറാക്കുന്നത്. ഇന്ന് മുതല്‍ 19 വരെ ഒന്നിച്ച് പക്ഷിനിരീക്ഷണത്തില്‍ പങ്കാളികളാവുകയാണ് ചെയ്യുന്നത്. ബേഡ് കൗണ്ട് ഇന്ത്യ പാര്‍ട്ണര്‍ഷിപ്പ് എന്ന സംഘടനയുടെ നേതൃത്വത്തിലാണ് ഇന്ത്യയില്‍ പക്ഷികളുടെ ഡിജിറ്റല്‍ വിവരങ്ങള്‍ ശേഖരിക്കുന്നത്. കേരളത്തില്‍ ഏകദേശം ഇരുപതോളം കൂട്ടായ്മകള്‍ ബേഡ് കൗണ്ട് ഓഫ് ഇന്ത്യയുമായി സഹകരിക്കുന്നുണ്ട്.

38,000 കിലോമീറ്റര്‍ സ്‌ക്വയറിലുള്ള കേരളത്തിന്റെ ഭൂപടത്തെ 3,000ലധികം ചെറുസ്ഥലങ്ങളായി തിരിച്ച്, ആ സ്ഥലങ്ങളില്‍ ഓരോ 15 മിനിറ്റിലും കാണുന്ന പക്ഷികളുടെ എണ്ണവും ഇനങ്ങളും രേഖപ്പെടുത്തിയാണ് പക്ഷി ഭൂപടനിര്‍മാണം. കേരളത്തില്‍ പക്ഷിഭൂപടം തയാറാക്കാന്‍ തുടങ്ങിയത് 2014ലാണ്. 2020ഓടെ ഇത് പൂര്‍ത്തിയാകും.